بھارت کے شہر احمد آباد میں اس وقت شدید تشویش کی لہر دوڑ گئی جب لندن کے لیے روانہ ہونے والا ایک مسافر طیارہ حادثے کا شکار ہو گیا۔ بھارتی میڈیا رپورٹس کے مطابق حادثے کے وقت طیارے میں تقریباً 250 افراد سوار تھے جن میں گجرات کے سابق وزیراعلیٰ بھی شامل تھے۔
خبر رساں ادارے "نیوز 18” کے مطابق طیارہ اس وقت حادثے کا شکار ہوا جب وہ احمد آباد ایئرپورٹ سے لندن کی جانب ٹیک آف کر رہا تھا۔ اچانک تکنیکی خرابی یا کسی اور وجہ سے طیارے میں آگ بھڑک اٹھی یا دھواں بھر گیا، جس کے بعد رن وے پر ہی ایمرجنسی نافذ کر دی گئی۔
عینی شاہدین کے مطابق ایئرپورٹ کے اطراف کے علاقے میں دھوئیں کے سیاہ بادل دکھائی دیے۔ واقعے کے فوراً بعد فائر بریگیڈ کی گاڑیاں جائے وقوعہ پر پہنچ گئیں اور ریسکیو کارروائیاں شروع کر دی گئیں۔
تاحال کسی جانی نقصان یا زخمیوں کی حتمی تفصیلات سامنے نہیں آئیں، تاہم حکام نے ایئرپورٹ کو وقتی طور پر بند کر دیا ہے جبکہ تمام پروازیں معطل کر دی گئی ہیں۔ ایئرپورٹ سیکیورٹی اور ایوی ایشن ماہرین کی ٹیمیں بھی تحقیقات کے لیے موقع پر پہنچ گئی ہیں۔
گجرات کے سابق وزیراعلیٰ کی موجودگی نے واقعے کو مزید حساس بنا دیا ہے۔ عوام اور سیاسی حلقوں کی جانب سے ان کی خیریت کے لیے دعا کی جا رہی ہے۔
حادثے کی مکمل تحقیقات کا اعلان کر دیا گیا ہے اور ابتدائی رپورٹ جلد جاری کیے جانے کا امکان ہے۔
