رومن کیتھولک چرچ کے 266ویں پوپ فرانسس 88 سال کی عمر میں انتقال کر گئے ہیں۔
رومن کیتھولک چرچ کے 266ویں پوپ، فرانسس، 88 برس کی عمر میں انتقال کر گئے۔ ویٹی کن کے کیمرلینگو، کارڈینل کیون فیرل نے ان کے انتقال کی تصدیق کرتے ہوئے بتایا کہ "آج صبح 7:35 بجے روم کے بشپ، فرانسس، اپنے خالقِ حقیقی سے جا ملے۔”
پوپ فرانسس گزشتہ کئی ماہ سے پھیپھڑوں کی بیماری اور نمونیا میں مبتلا تھے، تاہم بیماری کے باوجود انہوں نے 20 اپریل 2025 کو ایسٹر اتوار کے موقع پر سینٹ پیٹرز اسکوائر میں "اربے ایٹ اوربی” (Urbi et Orbi) دعا کی قیادت کی۔
ویٹی کن کے مطابق، پوپ فرانسس کی آخری رسومات Basilica of Santa Maria Maggiore میں ادا کی جائیں گی، جیسا کہ انہوں نے اپنی وصیت میں ہدایت دی تھی۔ ویٹی کن نے انہیں خراج تحسین پیش کرتے ہوئے کہا کہ پوپ فرانسس نے اپنی پوری زندگی خداوند اور کلیسا کی خدمت کے لیے وقف کر دی۔
پوپ فرانسس، جن کا اصل نام خورخے ماریو برگولیو تھا، ارجنٹینا کے شہر بیونس آئرس میں پیدا ہوئے۔ 2013 میں وہ پوپ منتخب ہوئے، اور یوں وہ نہ صرف پہلے لاطینی امریکی بلکہ پہلے یسوعی پوپ بھی بنے۔
ان کا دور اصلاحات، انکساری، سماجی انصاف، اور ماحولیات سے جڑے اقدامات سے بھرپور رہا۔ وہ تاریخ کے پہلے پوپ ہوں گے جنہیں ویٹی کن کے باہر دفن کیا جائے گا۔
