اسرائیل کی جانب سے لبنان پر زمینی جنگ مسلط کر دی گئی، عالم برادری اس معاملے میں باتیں کرتی رہ گئی۔
غیر ملکی میڈیا کا کہنا ہے کہ اسرائیل نے شدید فضائی حملوں کے ساتھ ٹینکوں اور توپ خانے سے لبنان پر حملہ کردیا جس کی وجہ سے لبنانی فوج سرحد سے 5 کلو میٹر پیچھے ہٹ گئی۔
ادھر حزب اللہ نے کہا کہ سرحدی قصبوں میں اسرائیلی فوج کو نشانہ بنا رہے ہیں، راکٹوں سے اسرائیلی اڈوں پر بھی حملے کیے گئے جبکہ بیروت ائیرپورٹ کے قریب اسرائیل کی جانب سے حملہ کیاگیا اور سیدون شہر میں فلسطینی پناہ گزین کیمپ کو بھی نشانہ بنایا۔
غیر ملکی میڈیا کا کہنا ہے کہ لبنان پر سوموار کو اسرائیلی فضائی حملوں میں 95 شہری شہید اور 172 شدید زخمی ہوئے۔
دوسری جانب امریکا کا کہنا ہے کہ اسرائیل حزب اللہ کے بنیادی ڈھانچے کو نشانہ بنانے کے لیے محدود کارروائیاں کررہا ہے۔
سربراہ حزب اللہ نعیم قاسم نے کہا کہ اسرائیل سے طویل زمینی جنگ کے لیے تیار ہیں۔
واضح رہے کہ اسرائیل نے گزشتہ کئی روز سے لبنان پر بدترین فضائی بمباری جاری رکھی ہوئی ہے جس سے سینکڑوں افراد شہید ہوچکے ہیں، اسرائیلی فضائی حملوں میں سربراہ حزب اللہ حسن نصراللہ سمیت اعلیٰ قیادت بھی شہید ہوچکی ہے۔
