امریکی ری پبلکن پارٹی کے صدارتی امیدوار ڈونلڈ ٹرمپ کا کہنا ہے کہ نومبر میں صدارتی الیکشن میں شکست کی صورت میں وہ دوبارہ الیکشن نہیں لڑیں گے۔
غیر ملکی میڈیا سے گفتگو کے دوران سابق صدر ڈونلڈ ٹرمپ نے کہا کہ اگر وہ ڈیموکریٹ امیدوار کملا ہیرس سے ہار گئے تو یہ ان کے آخری الیکشنز ہوں گے تاہم امید ہے کہ میں ڈیموکریٹ امیدوار کے مقابلے میں کامیاب ہو جائوں گا۔
یاد رہے ڈونلڈ ٹرمپ اپنی پارٹی کی جانب سے مسلسل تیسری مرتبہ صدارتی انتخابات میں حصہ لے رہے ہیں اور ممکنہ طور پر یہ ان کے آخری الیکشنز ہوں گے۔
دوسری جانب ایرانی سپریم لیڈر خامنہ ای کی جانب سے ریاست مخالف جرائم کے مرتکب افراد سمیت ہزاروں قیدیوں کیلئے معافی کا اعلان کر دیا گیا ہے۔
غیر ملکی میڈیا کے مطابق عدلیہ کے سربراہ غلام حسین محسنی کی تجویز کے بعد علی خامنہ ای کی جانب سے 2,887 قیدیوں کی سزائیں معاف اور کم کرنے پر اتفاق کیا گیا ہے۔
غیر ملکی میڈیا کے مطابق 59 قیدیوں کی سزائے موت کو قید میں تبدیل کر دیا گیا ہے، اینٹی اسٹیٹ جرائم کے مرتکب 39 اور 40 غیر ملکی بھی معافی پانے والوں میں شامل ہیں۔
