روس کی جانب سے برطانیہ کے 6 سفیروں کو ملک بدر کر دیا گیا ہے۔
ماسکو، یوکرین جنگ میں مغربی ممالک کی بڑھتی مداخلت کے بعد روس کی جانب سے برطانیہ کے 6 سفیروں کو ملک بدر کر دیا گیا ہے۔
غیر ملکی میڈیا کے مطابق روس کی جانب سے یوکرین جنگ میں بڑھتی مداخلت کے تناظر میں انگلینڈ کے 6 سفارتکاروں کے اجازت نامے واپس لے کر انہیں ملک بدر کر دیا گیا ہے۔
روس کی وفاقی سیکیورٹی سروس ایجنسی (ایف ایس بی) نے کہا کہ جن سفیروں کے اجازت نامے واپس لیے گئے ان پر جاسوسی کا الزام ہے اور ان کی سرگرمیوں سے ملکی سلامتی کو خطرہ تھا۔
رپورٹ کے مطابق یہ اقدام ایک ایسے وقت میں سامنے آیا جب مغرب کی جانب سے یوکرین کو روس سے جنگ کے لیے مزید ہتھیار دینے اور انہیں روس کے خلاف استعمال کرنے کی اجازت دیئے جانے کی خبریں میڈیا پر زیر گردش ہیں۔
روسی صدر پیوٹن کے ایک بیان کے مطابق اگر نیٹو نے یوکرین کو مغربی ساختہ دور مار میزائلوں کو روس کے خلاف استعمال کرنے کی اجازت دی، تو اسے نیٹو کی روس سے جنگ سمجھا جائے گا، پھر ہم اس متعلق مناسب فیصلہ کریں گے۔
