وادی منیٰ میں پیدل چلنے والے حجاج کرام کے لئے سعودی حکام کا اہم اقدام۔
سعودی عرب میں وادی منیٰ، میدانِ عرفات اور مزدلفہ میں حجاج کرام کے بیٹھنے کے لیے آرام گاہ بنانے کا فیصلہ کیا گیا ہے۔
مکہ مکرمہ کے نائب گورنر شہزادہ سعود بن مشعل نے حج کی تیاری کے حوالے سے بریفنگ میں بتایا کہ حجاج کرام کے لئے پچاس ہزار مربع میٹر راستے کو سایہ دار بنایا جا رہا ہے، جبکہ جبل رحمت میں 60 ہزار مربع میٹر پر شیڈز اور پانی کی پھوار والے پنکھوں کی تنصیب بھی جاری ہے۔
خیال رہے کہ اس سال سعودی حکام کی جانب سے حج کرنے کے خواہشمند افراد کو ایک اور زبردست موقع فراہم کیا گیا ہے، نجی حج آپریٹرز کے ذریعے 10 ہزار عازمین حج کرسکیں گے۔
واضح رہے کہ سعودی وزارتِ حج و عمرہ نے حج 2025 کے لیے آنے والے زائرین کو خبردار کیا ہے کہ وہ صرف سرکاری سعودی پلیٹ فارمز کے ذریعے ہی حج کی بکنگ کریں اور مجاز حج ویزا حاصل کریں۔
وزارت نے واضح کیا ہے کہ غیر سرکاری ذرائع سے حاصل کی گئی کوئی بھی معلومات، پیشکشیں یا بکنگ غیر مصدقہ اور جعلی ہو سکتی ہیں، جن کی سعودی حکام نے نہ تو منظوری دی ہے نہ تصدیق۔
عوام کو مشورہ دیا گیا ہے کہ وہ حج سے متعلق تمام معلومات کی تصدیق محتاط انداز میں کریں تاکہ وہ جعلی اشتہارات، فراڈ اور دھوکے سے محفوظ رہیں۔
سعودی وزارت حج کا کہنا ہے کہ غیر سرکاری ذرائع سے بکنگ یا معلومات لینا نہ صرف خطرناک ہے بلکہ ممکنہ طور پر حج ویزا کی منسوخی کا باعث بھی بن سکتا ہے۔
حجاج کرام کو سختی سے ہدایت کی گئی ہے کہ وہ فراڈ سے بچنے کیلئے صرف تصدیق شدہ ذرائع سے رجوع کریں۔
