اسرائیلی فورسز کی جانب سے لبنان کے مختلف علاقوں میں بمباری کا سلسلہ تاحال جاری ہے، بیروت کے شہری علاقے میں رہائشی عمارت کو بھی فضائی حملے کا نشانہ بنایا گیا ہے۔
لبنانی وزارت صحت کا کہنا ہے کہ گزشتہ 24 گھنٹوں کے دوران لبنان کی وادی بقاع اور عین الدلب سمیت دیگر علاقوں میں اسرائیلی بمباری سے مزید 105 افراد شہید جبکہ درجنوں شدید زخمی ہوچکے ہیں۔
غیر ملکی میڈیا کے مطابق اسرائیلی فوج نے حزب اللہ کے 120 مقامات کو نشانہ بنانے کا دعویٰ کیا ہے جبکہ یمن کے ساحلی شہر الحدیدہ پر بھی بڑا فضائی حملہ کیا ہے، جس کے نتیجے میں 4 یمنی شہید اور 29 زخمی ہوگئے۔
ادھر غزہ پر بھی اسرائیلی بربریت اور ظلم میں کمی نہ آسکی، اسرائیل کے غزہ پر حملوں میں مزید 28 فلسطینی شہید ہوگئے۔
غیر ملکی میڈیا کے مطابق اسرائیلی فوج نے بھاری جنگی ہتھیاروں اور گاڑیوں کے ساتھ لبنان کی سرحد کی طرف پیش قدمی جاری رکھی ہوئی ہے جس سے لبنان پر زمینی حملے کے خدشات بڑھتے جارہے ہیں۔
دوسری جانب امریکی صدر جو بائیڈن کا کہنا ہے کہ مشرق وسطیٰ میں وسیع جنگ سے بچنا ہوگا، یہ انتہائی ضروری ہے۔
