وائٹ ہاؤس میں ترجمان قومی سلامتی کونسل جان کربی کا یہ کہنا ہے ایرانی حملے کی صورت میں امریکا اسرائیل کے دفاع کا پابند رہے گا۔
واشنگٹن، وائٹ ہاؤس میں ترجمان قومی سلامتی کونسل جان کربی کا یہ کہنا ہے کہ ایران کیلئے ہمارا پیغام ہے کہ وہ اسرائیل پر حملہ نہ کرے، ایرانی حملے کی صورت میں امریکا اسرائیل کے دفاع کا پابند رہے گا۔
غیر ملکی میڈیا کا کہنا ہے جان کربی کا کہنا تھا کہ حملے کے امکان کے حوالے سے کوئی پیش گوئی کرنا مشکل ہے تاہم وائٹ ہاؤس ایران کے مؤقف کو سنجیدگی سے لے رہا ہے۔
ترجمان جان کربی نے کہا کہ ہم یہ سمجھتے ہیں کہ وہ ابھی تک اچھی پوزیشن میں ہیں اور وہ حملہ کرنے کے لیے بھی تیار ہیں، اسی وجہ سے ہم نے خطے میں اپنی افواج میں بھی اضافہ کر دیا ہے۔
جان کربی کے مطابق ایران کے لیے ہمارا پیغام یکساں تھا اور یکساں رہے گا، پہلا یہ کہ ایسا نہ کرے کیونکہ اس معاملے کو بڑھانے کی کوئی وجہ موجود نہیں، ایک جامع علاقائی جنگ شروع کرنے کی کوئی وجہ نہیں پائی جاتی۔
واضح رہے کہ اس سے پہلے امریکا کے صدر جوبائیڈن بھی کہہ چکے ہیں کہ ایران نے اگر کوئی حملہ کیا تو امریکا اسرائیل کے ساتھ کھڑا ہو گا اور بھرپور دفاع کرے گا۔
