136
تھائی لینڈ کے کسان کی جانب سے انسانی زندگیوں کے تحفظ کیلئے اپنے 100 سے زائد مگرمچھ مار ڈالے گئے۔
غیر ملکی میڈیا کے مطابق شمالی تھائی لینڈ کے ٹاؤن لامفن میں مگرمچھوں کے فارم کے مالک اور 37 سالہ نتھپاک خمکد کا کہنا ہے کہ تالاب کے اطراف کی دیوار ٹوٹنے پر مگرمچھوں کے آبادی میں داخل ہونے کاخدشہ تھا۔
کسان کا کہنا تھا کہ خطرے کے پیش نظر انہوں نے اپنے مگرمچھوں کیلئے نیا گھر تلاش کرنا شروع کیا لیکن ان کے پاس مگرمچھوں کیلئے نیا گھر تلاش کرنے یا انہیں دوسری جگہ منتقل کرنے کا کوئی آپشن موجود نہیں تھا۔
کسان کا کہنا تھا کہ ان کے پاس موجود مگرمچھوں میں سے کچھ مگرمچھ 13 فٹ تک لمبے تھے لیکن انسانی آبادی کو خطرے سے بچانے کیلئے 125 مگرمچھوں کو مارا۔
کسان نے بتایا کہ ان مگرمچھوں کو مارنے کے لیے مشکل فیصلہ کرنا پڑا کیونکہ اگر دیوار گرجاتی تو لوگوں کی زندگیوں کا نقصان سب سے بڑا ہوتا کہ جسے ہم کنٹرول نہیں کرسکتے تھے۔
