بھارت، لکھنؤ میں آن لائن اسمارٹ فون منگوانے والے افراد کی جانب سے ڈیلیوری بوائے کو گلا گھونٹ کر مار ڈالا گیا۔
غیر ملکی میڈیا کے مطابق 30 سالہ ڈیلیوری بوائے بھرت پرجاپتی کو 23 ستمبر کے روز لکھنؤ میں اسمارٹ فون ڈیلیوری کے دوران موت کے گھاٹ اتار دیا گیا۔
غیر ملکی میڈیا کے مطابق ڈیلیوری بوائے بھرت، ہمانشو نامی شخص کے گھر اسمارٹ فون ڈیلیور کرنے کیلئے گیا تھا، ہمانشو کی جانب سے کیش آن ڈیلیوری پر انڈین آن لائن ایپ کے ذریعے اسمارٹ فون آرڈر کیا گیا تھا۔
غیر ملکی میڈیا کا کہنا ہے کہ بھرت جب ہمانشو کے گھر اسمارٹ فون کا آرڈر لے کر پہنچا تو وہاں موجود 2 لوگوں نے بھرت سے اسمارٹ فون لیکر اسے گلا گھونٹ کر موت کے گھاٹ اتار دیا اور اسکی لاش کو نہر میں پھینک دیا۔
غیر ملکی پولیس کے مطابق بھرت کے 2 روز تک گھر نہ پہنچنے کے بعد اس کے والدین نے پولیس میں ایف آئی آر درج کروائی جس کے بعد پولیس کی جانب سے تفتیش کا آغاز کیا گیا اور بھرت کے نمبر ٹریسنگ کے ذریعے ہمانشو کے گھر کا پتا لگاتے ہوئے 2 ملزمان کو حراست میں لے لیا گیا۔
تفتیش کے دوران ہمانشو اور اس کے ساتھی کی جانب سے بھرت کے قتل کا اعتراف کرلیا گیا جب کہ ملزمان کا ایک ساتھی فرار ہے۔
