ممبئی: آئی سی سی ویمنز ورلڈکپ کے فائنل میں جنوبی افریقا نے بھارت کے خلاف ٹاس جیت کر پہلے فیلڈنگ کرنے کا فیصلہ کیا ہے۔
تفصیلات کے مطابق میچ ممبئی کے ڈی وائی پاٹل اسٹیڈیم میں کھیلا جا رہا ہے، جہاں بارش کے باعث ٹاس دو گھنٹے کی تاخیر سے ہوا، تاہم اوورز میں کوئی کمی نہیں کی گئی۔
جنوبی افریقی کپتان لورا وولوارٹ نے ٹاس کے بعد گفتگو کرتے ہوئے کہا کہ یہ گراؤنڈ ہدف کے تعاقب کے لیے موزوں ہے، اور بارش کے باعث پچ پر نمی کے باعث ابتدائی اوورز میں بولرز کو مدد ملنے کی امید ہے۔
بھارتی کپتان ہرمنپریت کور نے کہا کہ وہ بھی موسم کی صورتحال کے باعث پہلے بولنگ کرنا چاہتی تھیں۔ ان کا کہنا تھا کہ ابتدائی پانچ سے چھ اوورز میں بیٹنگ کرنا قدرے مشکل ہوگا۔
ٹاس دوپہر 2 بجے ہونا تھا جبکہ میچ کا آغاز ڈھائی بجے مقرر تھا، تاہم گراؤنڈ کی آؤٹ فیلڈ میں پانی جمع ہونے کی وجہ سے انتظامیہ کو میچ شروع کرانے میں دشواری پیش آئی۔
یہ فائنل تاریخی حیثیت رکھتا ہے، کیونکہ ویمنز ورلڈکپ کی تاریخ میں پہلی بار ایسا ہوا ہے کہ آسٹریلیا یا انگلینڈ میں سے کوئی بھی ٹیم فائنل میں نہیں پہنچی۔
بھارت کی ٹیم اس سے قبل دو مرتبہ فائنل کھیل چکی ہے لیکن دونوں بار شکست کا سامنا کرنا پڑا، جبکہ جنوبی افریقا پہلی مرتبہ ویمنز ورلڈکپ کے فائنل میں جگہ بنانے میں کامیاب ہوا ہے۔
