اسنوکر کو دنیا کے مشکل ترین کھیلوں میں شمار کیا جاتا ہے، جہاں درست نشانہ، مکمل توجہ اور برسوں کی مشق درکار ہوتی ہے۔ یہی وجہ ہے کہ یہ کھیل عموماً بالغ اور تجربہ کار کھلاڑیوں تک محدود سمجھا جاتا ہے، تاہم برطانیہ سے تعلق رکھنے والے ایک دو سالہ بچے نے اس تصور کو یکسر بدل کر رکھ دیا ہے۔
برطانوی شہر مانچسٹر کے رہائشی جوڈی اوئنز نے اسنوکر میں غیر معمولی صلاحیت کا مظاہرہ کرتے ہوئے گنیز ورلڈ ریکارڈز میں اپنا نام درج کروا لیا ہے۔ حیران کن طور پر جوڈی نے اسنوکر کے دو مشکل شاٹس مکمل کر کے دو الگ عالمی ریکارڈز اپنے نام کیے ہیں، جس کے بعد انہیں اسنوکر کے مخصوص شاٹس مکمل کرنے والا کم عمر ترین فرد قرار دیا گیا ہے۔
تفصیلات کے مطابق، جوڈی اوئنز نے 12 اکتوبر 2025 کو پول بینک شاٹ کامیابی سے مکمل کیا، اس وقت ان کی عمر صرف 2 سال اور 302 دن تھی۔ اس سے قبل انہوں نے 2 سال اور 261 دن کی عمر میں اسنوکر کا ایک اور مشکل شاٹ، یعنی ڈبل پوٹ بھی کامیابی سے مکمل کیا تھا۔ ان دونوں کامیابیوں نے جوڈی کو عالمی سطح پر شہرت دلا دی۔
گنیز ورلڈ ریکارڈز کی جانب سے باقاعدہ تصدیق کے بعد جوڈی کا نام عالمی ریکارڈ ہولڈرز کی فہرست میں شامل کر لیا گیا ہے۔ گنیز کے مطابق، اتنی کم عمر میں اس نوعیت کے تکنیکی شاٹس مکمل کرنا ایک غیر معمولی کارنامہ ہے۔
جوڈی کے والد لیوک اوئنز نے بتایا کہ انہوں نے سب سے پہلے گھر میں اپنے بیٹے کی اسنوکر سے قدرتی دلچسپی اور مہارت کو محسوس کیا۔ ان کے مطابق،
“جب میں نے دیکھا کہ وہ چھڑی کو انگلیوں کے درست استعمال سے پکڑ رہا ہے تو مجھے اندازہ ہوگیا کہ اس میں اس کھیل کی فطری صلاحیت موجود ہے۔”
انہوں نے مزید بتایا کہ جوڈی ایک چھوٹے اسٹول کی مدد سے اسنوکر ٹیبل تک پہنچ کر کھیلتا ہے اور حیرت انگیز اعتماد کے ساتھ شاٹس لیتا ہے۔
گنیز ورلڈ ریکارڈز کی ٹیم نے جوڈی کی صلاحیت کا باقاعدہ مشاہدہ 2025 یوکے چیمپئن شپ کے موقع پر کیا، جہاں اس کی کارکردگی نے ماہرین کو بھی حیران کر دیا۔
ماہرین کے مطابق اگر جوڈی کی یہ صلاحیت اسی طرح نکھرتی رہی تو مستقبل میں وہ اسنوکر کی دنیا کا ایک بڑا نام بن سکتا ہے، اور یہ ننھا کھلاڑی آنے والے برسوں میں بڑے کھلاڑیوں کے لیے مثال ثابت ہو سکتا ہے۔
