سہ ملکی ٹی ٹوئنٹی سیریز میں دلچسپ مرحلہ، افغانستان نے پاکستان کو شکست دے کر پوائنٹس ٹیبل پر برابری حاصل کر لی۔ دونوں ٹیموں کے پوائنٹس چار چار ہو چکے ہیں، تاہم پاکستان بہتر رن ریٹ کی بنیاد پر سرفہرست ہے۔
سیریز کے چوتھے میچ میں افغانستان نے شاندار کارکردگی کا مظاہرہ کرتے ہوئے پاکستان کو 18 رنز سے شکست دی۔ افغانستان نے پہلے بیٹنگ کرتے ہوئے 169 رنز بنائے، جس کے جواب میں پاکستانی ٹیم 151 رنز تک محدود رہی۔
پاکستان کی جانب سے بیٹرز خاطر خواہ کارکردگی نہ دکھا سکے، صرف حارث رؤف نے آخر میں 16 گیندوں پر جارحانہ 34 رنز بنائے، لیکن یہ کوشش بھی ٹیم کو فتح نہ دلا سکی۔
یہ افغانستان کی سیریز میں مسلسل دوسری کامیابی تھی، جس کے بعد وہ چار پوائنٹس کے ساتھ دوسرے نمبر پر آ گیا۔ پاکستان نے بھی پہلے دو میچز جیت کر چار پوائنٹس حاصل کر رکھے ہیں اور وہ بہتر رن ریٹ کی وجہ سے پہلے نمبر پر ہے۔
یو اے ای کے پاس اب بھی اپ سیٹ کا موقع
سیریز میں تیسری ٹیم متحدہ عرب امارات (یو اے ای) ابھی تک کوئی میچ نہیں جیت سکی، لیکن اگلے میچز میں اپ سیٹ کی صورت میں صورتحال بدل سکتی ہے۔
کل پاکستان اور یو اے ای کے درمیان میچ کھیلا جائے گا۔ اگر یو اے ای پاکستان کو شکست دیتی ہے، تو اس کے دو پوائنٹس ہو جائیں گے۔ اس کے بعد یو اے ای کو افغانستان کے خلاف بھی میچ کھیلنا ہے، اور اگر وہ دونوں میچز جیت جاتا ہے تو وہ بھی چار پوائنٹس حاصل کر کے فائنل کی دوڑ میں شامل ہو سکتا ہے۔
کرکٹ میں کچھ بھی ممکن ہے
اگر تینوں ٹیموں کے پوائنٹس برابر ہو جاتے ہیں تو رن ریٹ کی بنیاد پر دو ٹیمیں فائنل کے لیے کوالیفائی کریں گی۔ اگرچہ یو اے ای کی جیت کے امکانات کم سمجھے جا رہے ہیں، لیکن کرکٹ کے غیر متوقع مزاج کو دیکھتے ہوئے کچھ بھی ممکن ہے۔
موجودہ صورتحال میں فائنل پاکستان اور افغانستان کے درمیان کھیلا جانے کا قوی امکان ہے، تاہم کل (جمعرات) کو ہونے والے پاکستان بمقابلہ یو اے ای میچ کے بعد ہی فائنل کی دو ٹیموں کا حتمی فیصلہ ہو سکے گا۔
