آئی سی سی کے بڑے مقابلے میں روایتی حریف آمنے سامنے آئے تو سنسنی خیز مقابلے کی توقعات بھی بڑھ گئیں۔ ICC T20 World Cup کے گروپ میچ میں بھارت کرکٹ ٹیم نے پہلے بیٹنگ کرتے ہوئے پاکستان کرکٹ ٹیم کو جیت کیلئے 176 رنز کا ہدف دیا۔
ٹاس اور میچ کا آغاز
یہ میچ پریماداسا اسٹیڈیم میں کھیلا گیا جہاں پاکستانی کپتان سلمان علی آغا نے ٹاس جیت کر بھارت کو پہلے بیٹنگ کی دعوت دی۔ ٹاس کے موقع پر دونوں ٹیموں کے کپتانوں کے درمیان ہاتھ نہ ملانے کا منظر بھی شائقین کی توجہ کا مرکز بنا رہا۔
بھارتی اننگز: مضبوط آغاز، درمیانی اوورز میں جھٹکے
بھارت نے مقررہ 20 اوورز میں 7 وکٹوں کے نقصان پر 175 رنز بنائے۔ اوپنر ابھیشیک شرما پہلے ہی اوور میں بغیر کوئی رن بنائے آؤٹ ہوگئے، تاہم اس کے بعد اننگز کو ایشان کشن نے سنبھالا اور 40 گیندوں پر شاندار 77 رنز اسکور کیے۔
درمیانی اوورز میں پاکستان نے واپسی کی کوشش کی۔ 15ویں اوور میں 126 کے مجموعی اسکور پر تلک ورما 25 رنز بنا کر آؤٹ ہوئے جبکہ اگلی ہی گیند پر ہاردک پانڈیا بھی بغیر کھاتہ کھولے پویلین لوٹ گئے۔ بعد ازاں بھارتی کپتان سوریا کمار یادیو 32 رنز بنا کر آؤٹ ہوئے۔ دیگر بیٹرز میں دوبے نے 27 رنز بنائے جبکہ اکشر پٹیل کوئی رن نہ بنا سکے۔
ٹی 20 ورلڈکپ: پاکستان کے خلاف بھارتی اسکواڈ میں بڑی تبدیلیاں، ابھیشیک شرما کی واپسی
پاکستانی باؤلرز کی کارکردگی
پاکستان کی جانب سے نوجوان آل راؤنڈر صائم ایوب نے نمایاں کارکردگی دکھاتے ہوئے 3 وکٹیں حاصل کیں۔ اس کے علاوہ شاہین شاہ آفریدی، عثمان طارق اور سلمان آغا نے ایک ایک وکٹ حاصل کی، جبکہ ایک بھارتی بیٹر رن آؤٹ ہوا۔
دونوں ٹیموں کی پلیئنگ الیون
پاکستان کی ٹیم میں کوئی تبدیلی نہیں کی گئی۔ پلیئنگ الیون میں صائم ایوب، صاحبزادہ فرحان، بابر اعظم، سلمان علی آغا، عثمان خان، شاداب خان، محمد نواز، فہیم اشرف، شاہین آفریدی، ابرار احمد اور عثمان طارق شامل ہیں۔
دوسری جانب بھارت نے ٹیم میں دو تبدیلیاں کیں اور ابھیشیک شرما کے ساتھ اسپنر کُلدیپ یادیو کو بھی پلیئنگ الیون کا حصہ بنایا۔
ہدف کا تعاقب: دباؤ اور توقعات
176 رنز کا ہدف ٹی ٹوئنٹی فارمیٹ میں چیلنجنگ ضرور ہے مگر ناقابلِ حصول نہیں۔ پاک بھارت مقابلوں میں ماضی میں بھی بڑے اہداف کا کامیاب تعاقب دیکھا گیا ہے۔ اب نظریں پاکستانی بیٹنگ لائن پر مرکوز ہیں کہ وہ اس دباؤ کو کیسے سنبھالتی ہے اور ٹیم کو فتح سے ہمکنار کرتی ہے۔
