بنگلہ دیش کرکٹ بورڈ (بی سی بی) کا کہنا ہے کہ آل راؤنڈر شکیب الحسن جب تک مجرم قرار نہیں پاتے کھیلتے رہیں گے۔
بی سی بی نے بنگلہ دیشی کرکٹر شکیب الحسن کے خلاف درج ہونے والے مقدمے سے متعلق بیان جاری کیا ہے، بیان کے مطابق شکیب الحسن کو وطن واپس نہیں بلایا جائے گا، وہ پاکستان کے خلاف دوسرے ٹیسٹ میچ کے لیے ٹیم کو دستیاب ہوں گے۔
صدر بی سی بی فاروق احمد کا اس متعلق یہ کہنا تھا کہ شکیب الحسن کھیلتے رہیں گے، لیگل نوٹس موصول ہو گیا ہے، جواب دیا ہے کہ وہ ابھی کھیل جاری رکھیں گے، ابھی ایف آئی آر درج ہوئی ہے اور ابتدائی مرحلے میں ہے، اور بہت کچھ ہونا باقی ہے۔
فاروق احمد کے مطابق جب تک جرم ثابت نہ ہو جائے وہ کھیلیں گے، بنگلہ دیش کرکٹ ٹیم نے پاکستان کے بعد بھارت جانا ہے، ہم چاہتے ہیں وہ سیریز بھی کھیلیں، کرکٹر شکیب الحسن ہمارا کنٹریکٹڈ کھلاڑی ہے، ہم قانونی معاونت کریں گے۔
واضح رہے کہ بی سی بی سے یہ مطالبہ کیا گیا تھا کہ قتل کے مقدمے میں نامزد ہونے پر شکیب الحسن پر پابندی لگائی جائے جبکہ مقدمے میں نامزد ہونے کے بعد بی سی بی کو لیگل نوٹس بھی بھجوایا گیا تھا۔
