لاہور: چیئرمین پاکستان کرکٹ بورڈ محسن نقوی نے پی ایس ایل فرنچائزز کے ساتھ نئے 10 سالہ معاہدے جلد از جلد مکمل کرنے کی ہدایت دے دی ہے۔ ذرائع کے مطابق پی ایس ایل فرنچائز معاہدے کی تیاریاں اب آخری مراحل میں داخل ہوچکی ہیں۔
پی ایس ایل کی چارٹرڈ ویلیوایشن فرم کے نمائندوں نے چیئرمین پی سی بی سے ملاقات کی، جس میں چیف ایگزیکٹو آفیسر سلمان نصیر اور سی او او سمیر سید بھی موجود تھے۔ اس موقع پر ویلیوایشن فرم نے محسن نقوی کو پی ایس ایل کی ویلیوایشن رپورٹ پیش کی۔
ذرائع کے مطابق محسن نقوی نے رپورٹ کے مختلف نکات پر سوالات کیے اور چارٹرڈ فرم کو ہدایت دی کہ وہ تمام فرنچائزز سے ملاقات کرکے ان کے مؤقف کو بھی رپورٹ میں شامل کرے۔
چیئرمین پی سی بی نے کہا کہ نیا معاہدہ ویلیوایشن رپورٹ کی بنیاد پر طے کیا جائے گا اور اس کے تحت فرنچائزز کی نئی مارکیٹ ویلیو متعین کی جائے گی۔
ویرات کوہلی نے وائٹ بال کرکٹ میں سچن ٹنڈولکر کا عالمی ریکارڈ توڑ دیا
یہ بھی بتایا گیا ہے کہ پی ایس ایل کی چھ فرنچائزز کے موجودہ معاہدے دسمبر میں ختم ہو رہے ہیں، جبکہ پی سی بی نے اشارہ دیا ہے کہ فرنچائزز کی تعداد آئندہ سیزن سے 8 تک بڑھ سکتی ہے۔
پی سی بی کے مطابق نئے معاہدے صرف اہل فرنچائزز کے ساتھ ہوں گے اور مقصد لیگ کو مزید منافع بخش اور شفاف مالی ڈھانچے میں تبدیل کرنا ہے۔
