پاکستان کرکٹ بورڈ (پی سی بی) نے سال 2025-26 کے لیے قومی کرکٹرز کے سینٹرل کانٹریکٹس کا اعلان کر دیا ہے۔ دلچسپ بات یہ ہے کہ اس بار قومی ٹیم کا کوئی بھی کھلاڑی اے کیٹیگری کے لیے اہل نہیں ٹھہرا، جس کی وجہ سے پی سی بی نے اے کیٹیگری کو ختم کر دیا ہے۔
اس سال پی سی بی نے 30 کھلاڑیوں کو کانٹریکٹس دیے ہیں جو یکم جولائی 2025 سے 30 جون 2026 تک لاگو ہوں گے۔ کانٹریکٹس کی تقسیم کیٹیگریز بی، سی اور ڈی میں کی گئی ہے، ہر کیٹیگری میں 10 کھلاڑی شامل ہیں۔ گزشتہ سال یہ تعداد 27 تھی اور 12 نئے کھلاڑی بھی اس سال شامل کیے گئے ہیں۔
نئے شامل ہونے والے کھلاڑیوں میں احمد دانیال، فہیم اشرف، حسن علی، حسن نواز، حسین طلعت، خوشدل شاہ، محمد عباس، محمد حارث، محمد نواز، صاحبزادہ فرحان، سلمان مرزا اور صوفیان مقیم شامل ہیں۔ 9 کھلاڑی اپنی سابقہ کیٹیگری برقرار رکھنے میں کامیاب ہوئے، جبکہ 8 کھلاڑی کانٹریکٹ حاصل کرنے میں ناکام رہے۔
رواں برس اے کیٹیگری میں کسی کھلاڑی کو شامل نہ کیے جانے کی وجہ سے یہ کیٹیگری ختم کر دی گئی ہے، جبکہ گزشتہ سال بابر اعظم اور محمد رضوان اس کیٹیگری میں شامل تھے۔ اس بار نسیم شاہ کو سی کیٹیگری میں اور ٹیسٹ کپتان شان مسعود کو بی سے ڈی کیٹیگری میں منتقل کر دیا گیا ہے۔
بی کیٹیگری میں بابر اعظم، محمد رضوان، شاہین شاہ، فخر زمان، شاداب خان، ابرار احمد، حارث رؤف، حسن علی، صائم ایوب اور سلمان علی آغا کو شامل کیا گیا ہے۔ فخر زمان اس کیٹیگری میں واپس آئے ہیں۔
بابراعظم اور محمد رضوان اسٹرائیک ریٹ سب سے پیچھے رہ گئے
سی کیٹیگری میں شامل کھلاڑیوں میں عبدالله شفیق، نسیم شاہ، سعود شکیل، فہیم اشرف، ساجد خان، محمد نواز، محمد حارث، صاحبزادہ فرحان، حسن نواز اور نعمان علی شامل ہیں۔
ڈی کیٹیگری میں شان مسعود، حسین طلعت، محمد عباس، محمد وسیم جونیئر، محمد عباس آفریدی، خوشدل شاہ، احمد دانیال، سلمان مرزا، خرم شہزاد اور صوفیان مقیم کو شامل کیا گیا ہے۔
