پاکستان کے نمایاں گھڑ سوار عثمان خان نے بین الاقوامی سطح پر ملک کا نام روشن کرتے ہوئے ایشین گیمز 2026 کے لیے کوالیفائی کر لیا ہے۔ یہ کارنامہ انہوں نے فرانس میں ہونے والے انٹرنیشنل تھری سٹار ایونٹنگ مقابلے میں شاندار کارکردگی دکھا کر انجام دیا۔
عثمان خان نے اپنے گھوڑے ایڈن آف دی ورٹ کے ساتھ حصہ لیتے ہوئے سی سی آئی تھری سٹار لانگ فارمیٹ میں مجموعی طور پر چھٹی پوزیشن حاصل کی، جبکہ وہ ایونٹ کے سب سے نمایاں ایشیائی رائیڈر بھی قرار پائے۔
یہ کامیابی صرف انفرادی نہیں بلکہ قومی سطح پر بھی بڑی اہمیت رکھتی ہے، کیونکہ تین روزہ ایونٹ کے نیشنل پوزیشن مقابلے میں پاکستان نے مجموعی طور پر دوسری پوزیشن حاصل کی، جہاں میزبان فرانس پہلے نمبر پر رہا اور بھارت کے گھڑ سوار آشیش لمائے نویں پوزیشن پر رہے۔
عثمان خان نے اپنی کامیابی پر خوشی کا اظہار کرتے ہوئے کہا کہ ایشین گیمز کے لیے کوالیفائی کرنا ان کے لیے باعثِ فخر ہے۔ ان کی اس کامیابی سے نہ صرف پاکستان کو بین الاقوامی گھڑ سواری میں مزید پہچان ملی ہے بلکہ نوجوان ایتھلیٹس کے لیے بھی ایک نئی راہ ہموار ہوئی ہے۔
