6
سعودی عرب میں ہونے والی ورلڈ فٹنس چیلنج اینڈ باڈی بلڈنگ چیمپئن شپ میں پاکستان نے تین برانز میڈل جیت کر عالمی سطح پر اپنی قابلیت ثابت کر دی۔
پاکستان آرمی کی اولمپیئن ایتھلیٹ صدف صدیقی نے ماسٹرز کیٹیگری میں برانز میڈل حاصل کر کے اپنی شاندار کارکردگی برقرار رکھی۔ اس کے علاوہ، حوالدار مقبول احمد نے انفرادی ماسٹرز کیٹیگری اور انعام اللہ نے سینئرز کیٹیگری میں میڈل جیتا۔ تینوں ایتھلیٹس پاکستان آرمی سے تعلق رکھتے ہیں۔
چیمپئن شپ میں مینز ایونٹ میں 57 ممالک اور ویمنز ایونٹ میں 18 ممالک نے حصہ لیا۔
صدف صدیقی نے اپنی کامیابی کے بعد کہا کہ ’’ایتھلیٹکس میں پاکستان کی نمائندگی کرنے کے بعد ورلڈ فٹنس چیلنج میں برانز میڈل جیت کر بہت خوشی محسوس ہو رہی ہے۔ محنت اور جنون کے ساتھ کسی بھی عمر اور کسی بھی کھیل میں کامیابی حاصل کی جا سکتی ہے۔‘‘
انہوں نے خواتین کھلاڑیوں کے لیے پیغام دیا کہ ہمت نہ ہاریں اور مسلسل محنت سے کسی بھی شعبے میں عالمی سطح پر نام کمایا جا سکتا ہے۔
