لاہور: پاکستان وائٹ بال کرکٹ ٹیم کے ہیڈ کوچ مائیک ہیسن سہ ملکی ٹرائی نیشن ٹی ٹوئنٹی سیریز کے اختتام کے بعد چھٹیاں گزارنے اپنے وطن نیوزی لینڈ روانہ ہو گئے ہیں۔
نیوزی لینڈ روانگی سے قبل مائیک ہیسن نے سوشل میڈیا پر بیان جاری کیا کہ ’’میرا چہرہ تھکا ہوا ہے لیکن میں خوش ہوں۔ میں اپنے گھر واپس جانے کے لیے ایک لمبے سفر کا آغاز کر رہا ہوں۔‘‘
انہوں نے مزید کہا کہ وہ اپنی فیملی کو بہت مس کر رہے ہیں اور چند ہفتے اپنے گھر پر فیملی کے ساتھ گزاریں گے۔ ساتھ ہی انہوں نے گرم موسم کی بھی کمی محسوس کرنے کا ذکر کیا۔
ہیڈ کوچ نے پاکستانی کھلاڑیوں کی کارکردگی کو سراہتے ہوئے کہا کہ ’’جیت کے ساتھ سیزن کا اختتام ہونے پر بہت خوشی ہے، لڑکوں نے بہت اچھا کھیلا۔‘‘
پاکستان وائٹ بال ٹیم کی آئندہ چند ہفتوں میں مصروفیات محدود ہیں، اور جنوری کے پہلے ہفتے میں اسکواڈ تین ٹی ٹوئنٹی میچز کے لیے سری لنکا جائے گا۔ بعد ازاں جنوری کے آخری ہفتے میں آسٹریلیا کی ٹیم کا دورہ پاکستان میں شیڈول ہے، جس کے بعد ٹیم ٹی ٹوئنٹی ورلڈ کپ کے لیے سری لنکا روانہ ہوگی۔
یاد رہے کہ پاکستان نے سہ ملکی ٹی ٹوئنٹی سیریز کے فائنل میں سری لنکا کو 6 وکٹوں سے شکست دے کر ٹائٹل اپنے نام کیا تھا۔
