8
دبئی: پاک بھارت ٹاکرے سے قبل قومی کرکٹ ٹیم کی ایک اہم بیٹھک ہوئی جس میں کھلاڑیوں نے اپنی کارکردگی پر کھل کر بات کی اور بلے بازی میں ناکامی کا برملا اعتراف کیا۔
ذرائع کے مطابق ٹیم میٹنگ میں ہر کھلاڑی نے اپنے خیالات کا اظہار کیا۔ بیٹرز نے تسلیم کیا کہ وہ اپنی ذمہ داریاں بہتر طریقے سے ادا نہیں کر سکے اور اسٹرائیک کو روٹیٹ کرنا ضروری ہے، جبکہ بولرز نے اس بات کی نشاندہی کی کہ موجودہ کنڈیشنز بلے بازوں کے لیے قدرے دشوار ہیں۔
ذرائع کا کہنا ہے کہ کھلاڑیوں نے ٹیم مینجمنٹ کو یقین دہانی کرائی ہے کہ سپر فور مرحلے میں وہ عمدہ کھیل کا مظاہرہ کریں گے۔ اس موقع پر کوچ مائیک ہیسن نے بھی ٹیم پر مکمل اعتماد کا اظہار کیا۔
واضح رہے کہ ایشیا کپ کے دوران پاکستان نے تین میں سے دو میچز جیتے ہیں، تاہم بھارت کے خلاف شکست کا سامنا کرنا پڑا۔ ٹورنامنٹ کے دوران قومی بیٹرز خاطر خواہ کارکردگی دکھانے میں ناکام رہے ہیں۔
