پاکستان کرکٹ ٹیم نے ایشیا کپ 2025 کے فائنل میچ کی اپنی مکمل میچ فیس 7 مئی کو بھارتی حملے میں شہید ہونے والے معصوم بچوں اور عام شہریوں کے نام منسوب کر دی ہے۔
پاکستان کرکٹ بورڈ (پی سی بی) کی جانب سے جاری ایک بیان میں کہا گیا کہ ٹیم کی جانب سے یہ اقدام شہداء کے اہل خانہ سے اظہار یکجہتی کے طور پر کیا گیا ہے، اور ہماری دعائیں ان متاثرہ خاندانوں کے ساتھ ہیں۔
ایشیا کپ کا فائنل گزشتہ روز دبئی میں بھارت کے خلاف کھیلا گیا، جس میں پاکستان کو ایک سنسنی خیز مقابلے کے بعد آخری اوور میں 5 وکٹوں سے شکست ہوئی۔ میچ کے بعد بھارتی ٹیم کی جانب سے غیر روایتی رویہ دیکھنے میں آیا، جب انہوں نے ایشین کرکٹ کونسل کے چیئرمین محسن نقوی سے ٹرافی لینے سے انکار کر دیا، تاہم محسن نقوی نے بھی موقف پر قائم رہتے ہوئے بھارتی ٹیم کو ٹرافی دیے بغیر گراؤنڈ سے رخصت کر دیا۔
دوسری جانب بھارتی کپتان سوریا کمار یادیو کو ٹورنامنٹ کے دوران ایک سیاسی بیان پر جرمانہ بھی ہوا، لیکن انہوں نے میچ کے بعد پریس کانفرنس میں اعلان کیا کہ وہ اپنی میچ فیس بھارتی فوج کو عطیہ کریں گے۔
یاد رہے کہ رواں برس 7 مئی کو بھارت کی جانب سے پاکستان پر میزائل حملہ کیا گیا تھا، جس کے نتیجے میں کئی معصوم جانوں کا ضیاع ہوا۔ اس حملے کے جواب میں پاکستان نے فوری اور بھرپور ردعمل دیتے ہوئے دشمن کے سات جنگی طیارے مار گرائے اور متعدد بھارتی ایئر بیسز کو نشانہ بنایا۔ اس کے بعد کشیدگی میں شدت آنے پر بھارت نے امریکہ سے جنگ بندی کے لیے مدد مانگی، اور امریکی صدر نے ثالثی کرتے ہوئے دونوں ایٹمی قوتوں کے درمیان سیز فائر ممکن بنایا۔ امریکی صدر متعدد بار اس بات کا اظہار کر چکے ہیں کہ ان کی کوششوں سے خطے میں ایک بڑی جنگ ٹلی۔
