راولپنڈی: سہ ملکی ٹی ٹوئنٹی سیریز میں پاکستان نے زمبابوے کو 69 رنز سے شکست دے دی۔ راولپنڈی میں کھیلے گئے میچ میں پاکستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں پانچ وکٹ کے نقصان پر 195 رنز اسکور کیے۔
پاکستان کی بیٹنگ میں بابر اعظم نے 74 رنز اور صاحبزادہ فرحان نے 63 رنز بنائے اور ٹیم کی فتح میں نمایاں کردار ادا کیا۔ زمبابوے نے 196 رنز کے ہدف کے تعاقب میں محض 126 رنز بنائے اور پوری ٹیم آؤٹ ہوگئی۔ زمبابوے کے ریان برل نے نصف سنچری اسکور کی اور کچھ مزاحمت کی۔
پاکستانی بولنگ میں عثمان طارق نے شاندار کارکردگی دکھائی اور ہیٹ ٹرک سمیت چار کھلاڑیوں کو آؤٹ کیا، جبکہ محمد نواز نے دو وکٹیں حاصل کیں۔
میچ میں پاکستانی ٹیم میں دو تبدیلیاں کی گئیں، عثمان طارق اور نسیم شاہ کو پلیئنگ الیون میں شامل کیا گیا جبکہ سلمان مرزا اور ابرار احمد کو ڈراپ کردیا گیا۔
پاکستان نے اس سے قبل سیریز کے پہلے میچ میں زمبابوے کو پانچ وکٹوں سے شکست دی تھی اور گزشتہ روز سری لنکا کو سات وکٹوں سے ہرایا تھا، جس کے بعد ٹیم کی فتح کا سلسلہ برقرار رہا۔
