پاکستان نے ایشین جونیئر اسکواش چیمپئن شپ میں بھارت کو شکست دے کر 2 گولڈ، 2 سلور اور 3 برانز میڈلز جیت لیے، انڈر 13 اور انڈر 15 میں شاندار کارکردگی
سیئول: جنوبی کوریا میں جاری ایشین جونیئر اسکواش چیمپئن شپ 2025 میں پاکستان کے نوجوان کھلاڑیوں نے شاندار کارکردگی کا مظاہرہ کرتے ہوئے نہ صرف بھارت کو زیر کر لیا بلکہ مجموعی طور پر سات میڈلز بھی اپنے نام کر لیے۔ ایونٹ میں پاکستان نے دو گولڈ، دو سلور اور ایک برانز میڈل کے ساتھ ساتھ پلیٹ ڈویژن میں بھی دو ٹائٹلز جیت کر قومی پرچم سربلند کیا۔
بوائز انڈر 13 کے فائنل میں پاکستان کے سہیل عدنان نے بھارت کے آیان دھنوکا کو بآسانی شکست دی۔ میچ کا اسکور 5-11، 2-11، 13-11 اور 6-11 رہا، جس میں سہیل نے عمدہ مہارت اور دباؤ میں کھیلنے کی صلاحیت کا مظاہرہ کیا۔
انڈر 15 کیٹیگری میں پاکستان کے نعمان خان نے فائنل میں ہم وطن احمد رایان خلیل کو 10-12، 6-11 اور 2-11 سے شکست دے کر گولڈ میڈل جیتا۔ اس فائنل کی خاص بات یہ رہی کہ دونوں فائنلسٹ پاکستانی تھے، جس سے قومی اسکواش کی گہرائی کا اندازہ ہوتا ہے۔
یہ بھی پڑھیں: شان دار فتح! پاکستان انڈر 23 ورلڈ اسکواش چیمپئن بن گیا
گرلز انڈر 13 فائنل میں پاکستان کی ماہنور علی نے بہترین مقابلہ کیا لیکن چین کی ین ژیوان کے ہاتھوں پانچ سیٹوں کے سخت مقابلے میں شکست کھا گئیں۔ اس میچ کا اسکور 11-9، 6-11، 9-11، 11-9 اور 10-12 رہا۔
مین ایونٹ میں قومی کھلاڑیوں نے دو طلائی، دو چاندی اور ایک کانسی کا تمغہ جیتا، جبکہ پلیٹ ڈویژن میں بھی دو ٹائٹلز جیتے، جو نوجوان اسکواش کھلاڑیوں کی تربیت اور مہارت کا واضح ثبوت ہے۔
یاد رہے کہ پاکستان اسکواش کا ایک سنہرا ماضی رکھتا ہے، جہاں جہانگیر خان اور جان شیر خان جیسے عظیم کھلاڑیوں نے دنیا بھر میں نام کمایا۔ حالیہ جونیئر کھلاڑیوں کی کارکردگی اس عظمت کی بحالی کی امید جگا رہی ہے، اور یہ کامیابی آئندہ برسوں میں عالمی سطح پر پاکستان کی اسکواش واپسی کا پیش خیمہ ثابت ہو سکتی ہے۔
