لاہور میں چیئرمین پاکستان کرکٹ بورڈ (پی سی بی) محسن نقوی نے کہا ہے کہ بنگلہ دیش کرکٹ بورڈ کا مؤقف مکمل طور پر اصولوں پر مبنی ہے اور پاکستان کرکٹ بورڈ آئی سی سی کے دوہرے معیار کو یکسر مسترد کرتا ہے۔
لاہور میں قومی کرکٹ ٹیم کے کھلاڑیوں سے ملاقات کے دوران محسن نقوی نے آئی سی سی ٹی ٹوئنٹی ورلڈ کپ کے حوالے سے پی سی بی کے مؤقف پر کھلاڑیوں کو اعتماد میں لیا۔ اس موقع پر قومی کھلاڑیوں نے چیئرمین پی سی بی کے اصولی مؤقف کو سراہتے ہوئے اس کی مکمل حمایت کا اعلان کیا۔
محسن نقوی نے کہا کہ ورلڈ کپ کے دوران بھارت میں میچز نہ کھیلنے سے متعلق بنگلہ دیش کرکٹ بورڈ کا فیصلہ اصولوں اور انصاف پر مبنی ہے۔ انہوں نے واضح کیا کہ پی سی بی نے کرکٹ کے بنیادی اور سنہری اصولوں کو مدنظر رکھتے ہوئے بنگلہ دیش کی حمایت کی ہے۔ ان کا کہنا تھا کہ اس معاملے پر پاکستانی حکومت جو بھی فیصلہ کرے گی، پی سی بی اس پر من و عن عمل کرے گا۔
بنگلا دیش ٹی ٹوئنٹی ورلڈکپ سے باہر، آئی سی سی نے اسکاٹ لینڈ کو شامل کرنے کا اعلان
چیئرمین پی سی بی کا کہنا تھا کہ کرکٹ کو سیاست سے آلودہ کرنا کسی کے مفاد میں نہیں۔ تمام فریقین کو کرکٹ کے طے شدہ اصولوں کے مطابق آگے بڑھنا چاہیے۔ انہوں نے کہا کہ پاکستانی کھلاڑی باصلاحیت ہیں اور ہر سطح پر مقابلہ کرنے کی مکمل صلاحیت رکھتے ہیں، جبکہ کسی بھی میدان میں کامیابی کا دارومدار ٹیم ورک پر ہوتا ہے۔
ملاقات کے دوران کھلاڑیوں نے بھی اس عزم کا اظہار کیا کہ وہ پی سی بی کے اصولی مؤقف کے ساتھ کھڑے ہیں اور قومی وقار پر کوئی سمجھوتہ نہیں کیا جائے گا۔
محسن نقوی نے اس موقع پر پاک آسٹریلیا ٹی ٹوئنٹی سیریز کے لیے قومی ٹیم کے لیے نیک تمناؤں کا اظہار کرتے ہوئے کہا کہ شائقین کرکٹ کی نظریں اس سیریز پر مرکوز ہیں اور قوم کو کھلاڑیوں سے بہترین کارکردگی کی پوری توقع ہے۔
