بھارت کے معروف فاسٹ باؤلر محمد شامی کو ایک سنگین دھمکی موصول ہوئی ہے، جس میں ایک نامعلوم شخص نے ان کی جان لینے کی دھمکی دیتے ہوئے ایک کروڑ روپے تاوان کا مطالبہ کیا ہے۔ یہ دھمکی مبینہ طور پر اتوار کے روز ای میل کے ذریعے دی گئی، جس کے بعد شامی کے بھائی محمد حسیب نے فوری طور پر پولیس کو اطلاع دی۔
بھارتی خبر رساں ادارے پریس ٹرسٹ آف انڈیا (PTI) کے مطابق، اتر پردیش کے ضلع امروہہ کے پولیس سپرنٹنڈنٹ امت کمار نے بتایا کہ واقعے کی رپورٹ درج کر لی گئی ہے۔ ای میل میں دعویٰ کیا گیا ہے کہ اگر بنگلورو کے ایک شخص "پربھاکر” کو مطلوبہ رقم ادا نہ کی گئی تو محمد شامی کی جان خطرے میں پڑ سکتی ہے۔ دھمکی دینے والے نے خود کو "راجپوت سندھر” کے نام سے متعارف کرایا ہے۔
پولیس نے مقدمہ درج کر کے تفتیش شروع کر دی ہے، اور سائبر کرائم یونٹ اس ای میل کی مکمل چھان بین کر رہی ہے تاکہ اصل بھیجنے والے کی شناخت اور مقام کا پتا لگایا جا سکے۔
اس واقعے کے بعد محمد شامی کی سیکیورٹی کے حوالے سے اقدامات کا ازسرنو جائزہ لیا جا رہا ہے، تاکہ ان اور ان کے خاندان کی حفاظت کو یقینی بنایا جا سکے۔
فی الحال شامی انڈین پریمیئر لیگ (IPL) کی فرنچائز ’سن رائزرز حیدرآباد‘ سے منسلک ہیں، تاہم وہ حالیہ میچوں میں ٹیم کا حصہ نہیں رہے۔
ذرائع کے مطابق، ان کی ناقص فارم اور ممکنہ فٹنس مسائل اس کی ممکنہ وجوہات ہیں۔ رواں سیزن میں وہ صرف نو میچوں میں میدان میں اُترے اور چھ وکٹیں حاصل کر سکے، جبکہ ایک میچ میں تین اوورز میں 48 رنز دینے کے بعد انہیں کوئی کامیابی حاصل نہ ہوئی۔
