ایشیا کپ 2025 کے فائنل سے پہلے بھارتی ٹیم کو ممکنہ طور پر بڑا دھچکا لگ سکتا ہے، کیونکہ آل راؤنڈر ہاردک پانڈیا کی فائنل میں شرکت مشکوک ہو گئی ہے۔
بھارتی میڈیا کے مطابق، پانڈیا سری لنکا کے خلاف سپر فور مرحلے کے آخری میچ کے دوران ران میں تکلیف کے باعث میدان سے باہر چلے گئے تھے۔
یہ میچ جمعہ 26 ستمبر کو دبئی انٹرنیشنل کرکٹ اسٹیڈیم میں کھیلا گیا، جس میں بھارت نے پہلے بیٹنگ کرتے ہوئے 202 رنز کا ہدف دیا۔ پانڈیا نے اپنے پہلے اوور میں ہی کوسل مینڈس کو آؤٹ کیا، تاہم اوور کے اختتام پر وہ ران پر ہاتھ رکھے دکھائی دیے اور فوری طور پر گراؤنڈ سے باہر چلے گئے۔ وہ دوبارہ میچ میں واپس نہیں آئے۔
بھارتی ٹیم کے بولنگ کوچ مورنے مورکل نے وضاحت کی ہے کہ پانڈیا کو شدید کریمپس کا سامنا تھا اور یہ کوئی سنگین انجری نہیں لگتی۔ ان کے مطابق، "ہفتے کو ان کی فٹنس کا جائزہ لیا جائے گا، جس کے بعد فائنل میں شرکت کا فیصلہ کیا جائے گا۔”
دوسری جانب، نوجوان بیٹر ابھیشیک شرما بھی دورانِ فیلڈنگ کریمپس کا شکار ہوئے لیکن بعد میں میدان میں واپس آگئے۔ انہوں نے اس میچ میں مسلسل تیسری نصف سنچری اسکور کی، اور مکمل طور پر فٹ نظر آئے۔
سری لنکن بیٹر شناکا رن آؤٹ ہونے کے باوجود آؤٹ کیوں نہیں ہوئے؟
اگر ہاردک پانڈیا فائنل کے لیے دستیاب نہ ہوئے تو بھارتی ٹیم میں ان کی جگہ ارشدیپ سنگھ کو شامل کیے جانے کا امکان ظاہر کیا جا رہا ہے۔
میچ میں سری لنکن بیٹر پتھم نسانکا نے 107 رنز کی شاندار اننگز کھیل کر اپنی ٹیم کو میچ برابر کروانے میں اہم کردار ادا کیا، تاہم سپر اوور میں بھارت نے صرف ایک گیند پر 3 رنز کا ہدف حاصل کر کے فتح حاصل کی۔
یاد رہے کہ ایشیا کپ 2025 کا فائنل بھارت اور پاکستان کے درمیان کھیلا جائے گا، جو اس ایونٹ کی تاریخ میں دونوں روایتی حریفوں کے درمیان پہلا فائنل ہوگا۔ بھارت 2022 کے بعد سے ٹی ٹوئنٹی فارمیٹ میں پاکستان کے خلاف ناقابلِ شکست رہا ہے۔
