انڈور: آئی سی سی ویمنز ورلڈ کپ سے قبل بھارت میں افسوسناک واقعہ پیش آیا، جہاں آسٹریلیا کی دو خواتین کرکٹرز کو مبینہ طور پر ہراساں کیا گیا۔ واقعہ ریاست مدھیہ پردیش کے شہر انڈور میں جمعرات کی صبح پیش آیا۔
بھارتی میڈیا کے مطابق، ایک موٹر سائیکل سوار شخص نے کھلاڑیوں کا پیچھا کیا اور نامناسب انداز میں چھوا، جس کے بعد وہ فرار ہوگیا۔ دونوں کھلاڑیوں نے فوراً ایس او ایس الرٹ بھیجا اور ٹیم کے سیکیورٹی منیجر ڈینی سمنز کو اطلاع دی۔
شکایت پر پولیس نے ایم آئی جی تھانے میں مقدمہ درج کرتے ہوئے ملزم عقیل خان کو گرفتار کر لیا۔ پولیس کے مطابق، ایک راہگیر نے ملزم کی موٹر سائیکل کا نمبر نوٹ کیا تھا جس کی مدد سے اس کی شناخت ممکن ہوئی۔
پولیس افسر ندھی راگھونشی نے بتایا کہ ملزم کے خلاف پہلے بھی متعدد مقدمات درج ہیں۔ اس پر بھارتیہ نیائے سنہیتا (BNS) کی دفعات 74 (خواتین کی عزت مجروح کرنے کے لیے طاقت کا استعمال) اور 78 (تعاقب کرنا) کے تحت مقدمہ قائم کیا گیا ہے۔
بھارت: آسٹریلوی ویمن کرکٹرز کے کھانے کے دوران چوہا داخل
ایڈیشنل کمشنر آف پولیس ہیمانی مشرا نے متاثرہ کھلاڑیوں سے ملاقات کر کے ان کے بیانات قلم بند کیے۔ پولیس نے یقین دلایا ہے کہ واقعے کی مکمل تحقیقات کی جا رہی ہیں جبکہ آسٹریلوی ٹیم کی سیکیورٹی مزید سخت کر دی گئی ہے۔
