پاکستانی اسنوکر پلیئرز اسجد اقبال اور اویس منیر کوارٹر فائنل میں پہنچ گئے۔
منگولیا، اسنوکر ورلڈ کپ میں پاکستان کے دونوں کھلاڑی اسجد اقبال اور اویس منیر کوارٹر فائنل میں پہنچنے میں کامیاب ہوچکے ہیں۔
پری کوارٹر فائنل میں اسجد اقبال کا مقابلہ ہانگ کانگ کے چینگ یو کیو سے تھا جس میں پاکستانی کھلاڑی نے حیران کن کھیل کا مظاہرہ کرتے ہوئے اپنے مقابل کو 4-1 سے شکست دے دی۔
پہلا فریم ہارنے کے بعد اسنوکر پلیئر اسجد نے عمدہ کھیل پیش کیا اور اگلے 4 فریم مسلسل جیت کر کوارٹر فائنل میں جگہ بنالی۔
پاکستان کے دوسرے کیوسٹ اویس منیر نے بھی ہانگ کانگ کے کھلاڑی چاؤ ہومن کو 4-2 سے شکست دے دی۔
دوسری جانب ایشین ہاکی چیمپئنز ٹرافی میں پاکستان نے جنوبی کوریا کو 2-5 سے شکست دیکر کانسی کا تمغہ جیت لیا ہے۔
ایونٹ کا فائنل آج چین اور بھارت کے درمیان کھیلا جائے گا۔
چین میں جاری ایونٹ میں تیسری پوزیشن کے میچ میں پاکستان ہاکی ٹیم نے جنوبی کوریا کے خلاف 5 گول سکور کیے، پاکستان کی جانب سے سفیان خان اور حنان شاہد نے 2، 2 اور رومان نے ایک گول سکور کیا۔
