سابق کپتان یونس خان کا کہنا ہے کہ کپتان بابراعظم 15 ہزار رنز بنا سکتے ہیں مگر انہیں کپتانی کے چکر سے جان چھڑانا پڑے گی، ویرات کوہلی کی مثال سب کے سامنے ہے، انہوں نے کپتانی کو چھوڑ کر اپنا کھیل بہترکیا۔
کراچی میں پریس کانفرنس کے دوران سابق کپتان کرکٹ ٹیم یونس خان نے قومی وائٹ بال ٹیم کے کپتان کو کرکٹ پر فوکس کرنے کا مشورہ دیتے ہوئے کہا کہ سابق کپتان نے چھوٹی عمر میں بہت کچھ حاصل کرلیا، سوال یہ ہے کہ انہوں نے آگے کیا کرنا ہے، کیونکہ کپتانی انکی نظر میں بہت چھوٹی چیز ہے۔
یونس خان کا کہنا تھا کہ میں نے تو صرف 10 ہزار رنز بنائے ہیں لیکن بابراعظم ایسے کھلاڑی ہیں جو 15 ہزار رنز بھی بناسکتے ہیں، لیکن کپتانی چھوڑنی ہوگی، ہر کوئی بابراعظم کو پرفارم کرتا دیکھنا چاہتا ہے۔
سابق کپتان قومی کرکٹ ٹیم نے سابق بھارتی ٹیم کے کپتان ویرات کوہلی کی مثال دیتے ہوئے یہ کہا کہ وہ کپتانی چھوڑنے کے بعد مزید اچھی کارکردگی دکھا رہے ہیں، میں بھی 3،4 بار کپتانی کو چھوڑ چکا ہوں۔
یونس خان کا کہنا تھا کہ ہمارے کھلاڑی بولتے زیادہ ہیں اور کھیلتے کم ہیں، ٹیم میں موجود کھلاڑیوں کو باتیں کرنے سے زیادہ اپنی کارکردگی دکھانی چاہیے، کیونکہ بولنے کا کام ہم جیسے ریٹائرڈ بندوں کا ہے۔
یونس خان کا کہنا تھا کہ کھلاڑی سوشل میڈیا چلائیں لیکن بیٹ اور بال سے اپنے ناقدین کو جواب دیں، کھلاری اپنی فٹنس بہتر بنائیں اور جو موقع مل رہا ہے اس کو پرفارم کر کے اچھا بنائیں۔
