سابق فاسٹ باؤلر وقار یونس کا کہنا تھا کہ اب تک ایسا کوئی تباہی مچا دینے والا فاسٹ باؤلر نظر نہیں آیا۔
فیصل آباد میں پاکستان کرکٹ بورڈ کے زیر اہتمام چیمپئنز ون ڈے کپ جاری ہے، 52 سالہ سابق فاسٹ باؤلر وقار یونس لائنز ٹیم کے مینٹور ہیں۔
مینٹور وقار یونس قومی ٹیم میں شامل اور چیمپئنز ون ڈے کپ میں سامنے آنے والے باؤلرز کی کارکردگی سے مطمئن دکھائی نہیں دے رہے ہیں اور وقار یونس کا کہنا تھا کہ ابھی تک ایسا کوئی فاسٹ باؤلر نظر نہیں آیا جس کو دیکھ کر یہ محسوس ہو کہ وہ مخالف ٹیم کی بیٹنگ لائن میں تباہی مچا دے گا۔
سابق ٹیسٹ کرکٹر وقار یونس کا کہنا تھا کہ ہمارے فاسٹ باؤلرز کو فٹنس کے مسائل کا سامنا ہے۔
مینٹور قومی کرکٹ ٹیم نے کہا کہ پاکستان کرکٹ کی بہتری کے لیے ہمیں ریڈ اور وائٹ بال کے کھلاڑیوں کو الگ الگ کرکے سوچنا ہوگا۔
یاد رہے کہ سابق ٹیسٹ کرکٹر اور مایہ ناز فاسٹ باولر وقار یونس پاکستان کرکٹ بورڈ میں مینٹور کے طور پر اپنی ذمہ داریاں سرانجام دے رہے ہیں، اس معاملے میں وہ چیئرمین پی سی بی محسن نقوی سے بھی رابطے میں رہتے ہیں۔
