پشاور، مشیر اطلاعات خیبرپختونخوا بیرسٹر ڈاکٹر سیف کا کہنا ہے کہ خواجہ آصف، وزیراعلیٰ علی امین گنڈا پور کے خلاف بیان دینے سے پہلے پارلیمنٹ کی عزت کو بحال کریں۔
گورنر کے پی اور خواجہ آصف کے بیان پر ردعمل دیتے ہوئے بیرسٹر سیف کا یہ کہنا تھا کہ فیڈریشن پر حملہ علی امین گنڈاپور نے نہیں کیا بلکہ حملہ 10 ستمبر کو ہوا تھا، خواجہ آصف بارڈر کی حفاظت کرتے تو علی امین گنڈا پور کو خود افغانستان سے بات کی ضرورت نہ پڑتی۔
وزیراعلیٰ کے پی علی امین گنڈا پور کا یہ کہنا تھا کہ کراس بارڈر دہشت گردی وفاقی مسئلہ ہے جس میں وہ بری طرح ناکام ہے، حفاظت نہیں کر سکتے تو بارڈر کا انتظام خیبر پختونخوا کے حوالے کریں۔
وزیر اعلیٰ کے پی کا یہ کہنا تھا کہ جعلی حکومت نے ملک کو انتہائی نازک صورتحال میں دھکیلا، گورنر اور وزیراعظم ٹیلیفون کال پر ڈرامہ بازیاں بند کریں۔
پی ٹی آئی کے رہنما کا یہ کہنا تھا کہ ملک کی بگڑتی صورتحال کی ذمہ دار جعلی وفاقی حکومت ہے، جعلی حکومت سے ملک نہیں چل رہا۔
صوبائی مشیر اطلاعات نے کہا کہ گورنر نہ 3 میں ہے اور نہ 13 میں، بس صرف بیان بازی کر رہے ہیں، گورنر کے پی، اپنے منصب کے خلاف کارروائیوں میں مصروف ہیں، اپنی حرکتوں کی وجہ سے یہ نااہل ہوچکے ہیں۔
