چیف جسٹس آف پاکستان قاضی فائز عیسیٰ کا کہنا ہے کہ وردی پہن کر کوئی کہے کہ وہ قانون کے تابع نہیں ہے تو ایسے نہیں ہو سکتا۔
سپریم کورٹ آف پاکستان میں سب انسپکٹر پنجاب پولیس غلام مرتضیٰ شاہ کی سروس بحالی کے خلاف اپیل کی سماعت کے موقع پر ریمارکس دیتے ہوئے چیف جسٹس قاضی فائز عیسیٰ کا مزید یہ کہنا تھا کہ ایسے لوگ پولیس کے ساتھ ساتھ ملک کی بھی بدنامی کرتے ہیں۔
سماعت کے دوران وکیل پنجاب حکومت نے دلائل میں کہا کہ سب انسپیکٹر غلام مرتضیٰ شاہ پر ایک شخص کو حبس بے جا میں رکھنے کا الزام ہے، ہماری عدالتوں میں حبس بے جا کے کیسز کی بھرمار ہے۔
سماعت کے دوران جسٹس قاضی فائز عیسیٰ نے کہا کہ ملک میں بے روزگاری بہت ہے، میرٹ پر لوگ آئیں گے تو پولیس کا ڈیپارٹمنٹ ٹھیک ہوگا۔
سپریم کورٹ کی جانب سے پنجاب حکومت کی اپیل منظور کرتے ہوئے غلام مرتضیٰ شاہ کو نوکری سے برخاست کرنے کا فیصلہ برقرار رکھا۔
اپنے حکم نامے میں سپریم کورٹ آف پاکستان نے کہا کہ کسی کو حبس بے جا میں رکھنا سنگین معاملہ ہے، پولیس امن و امان کی محافظ ہے، کسی کو غیر قانونی طور پر حراست میں نہیں رکھ سکتی ہے۔
