وزیراعظم پاکستان شہباز شریف کی جانب سے بلوچستان کے علاقے موسیٰ خیل میں مسافروں کو گاڑیوں سے اتار کر قتل کرنے کے دہشتگرانہ فعل کی شدید الفاظ میں مذمت کی گئی ہے اور اس افسوسناک واقعے کی رپورٹ بھی طلب کی گئی ہے۔
وزیراعظم کی جانب سے موسیٰ خیل میں مسافر بس پر دہشتگردانہ حملے پر شدید غصے کا اظہار کرتے ہوئے شہداء کیلئے دعائے مغفرت بھی کی گئی اورانکے لواحقین کیلئے صبر جمیل کی دعا بھی کی گئی۔
وزیراعظم پاکستان نے انتظامیہ کو لواحقین سے مکمل تعاون اور زخمیوں کو فوری طبی امداد کی فراہمی کی ہدایات جاری کیں ہیں، شہباز شریف نے اس سنگین معاملے میں قانون نافذ کرنے والے اداروں کو واقعے کی فوری تحقیقات کی ہدایت بھی کی ہے۔
شہباز شریف کا یہ بھی کہنا تھا ملک میں کسی بھی قسم کی دہشتگردی قبول نہیں کی جائے گی، موسیٰ خیل واقعے کے ذمہ دار دہشتگردوں کو سزائیں دی جائیں گی۔
دوسری جانب وزیر داخلہ محسن نقوی نے بھی موسیٰ خیل میں 23 افراد کے جاں بحق ہونے کے واقعے پردکھ کا اظہار کرتے ہوئے کہا کہ دہشتگردوں نے معصوم لوگوں کو نشانہ بناکر ظلم ڈھایا ہے، سفاکیت اور ظلم کی انتہا کی گئی، دہشتگرد اور انکے سہولت کار انجام سے بچ نہیں پائیں گے۔
