گوجرانوالہ، مرکزی رہنما پاکستان پیپلزپارٹی قمر زمان کائرہ کا کہنا ہے کہ ملکی مسائل کا حل کسی ایک جماعت کے پاس نہیں، سب کو مل کر کوششیں کرنا ہوں گی۔
گوجرانوالہ میں میڈیا سے گفتگو کرتے ہوئے سابقہ وفاقی وزیر قمر زمان کائرہ کا یہ کہنا تھا کہ پیپلز پارٹی بنیادی طور پر لوگوں کے مسائل حل کرنے کا نام ہے، جب پیپلز پارٹی بنائی گئی اس وقت مارشل لاء کا دور تھا، جب شہید ذوالفقار علی بھٹو نے پیپلز پارٹی کی بنیاد رکھی اس وقت ملک ٹوٹا ہوا تھا، شہید بھٹو نے اپنے حامیوں کے ساتھ مل کر اس قوم کے حوصلے بلند کئے۔
قمر زمان کائرہ نے کہا کہ آج پاکستان پھر سے دہشت گردی اور انتہا پسندی کا شکار ہے، آج غریب اپنے گھر کا بل اور بچوں کی فیس تک ادا نہیں کرسکتا، جب پاکستان پیپلزپارٹی اقتدار میں آتی ہے تو وہ مزدور سمیت ہر شخص کو اس کا حق ادا کرتی ہے، پی ٹی آئی کی حکومت نے اس ملک کو کچھ نہیں دیا۔
سابقہ وفاقی وزیر کا یہ کہنا تھا کہ اس ملک کے مسائل کا حل کسی ایک جماعت کے پاس نہیں، تمام جماعتوں کو مل کر اس ملک کے لئے کچھ کرنا ہوگا، ہمیں ملک کے لوگوں کے حقوق کے لیے لڑنا ہوگا، ہمیں مایوس نہیں ہونا، ہم نے مل کر مشکل وقت سے لڑنا ہے۔
قمر زمان کائرہ کا یہ کہنا تھا کہ بلوچستان کا معاملہ طول پکڑ گیا ہے، بلوچستان پاکستان کی شہ رگ نہیں پاکستان ہی ہے، ہمیں بلوچستان کے مسائل کا حل بلوچستان کے اندر سے نکالنا ہوگا۔
