مشیر اطلاعات کے پی بیرسٹر ڈاکٹر سیف کا کہنا ہے کہ مسودہ اتنا خوفناک لگ رہا ہے کہ اسے اپنے ہی ممبران سے پوشیدہ رکھا جارہا ہے۔
پشاور، مشیر اطلاعات خیبر پختونخوا بیرسٹر ڈاکٹر سیف کا کہنا ہے کہ مجوزہ آئینی ترامیم کا مسودہ میڈیا کے ذریعے قوم کے سامنے لایا جائے۔
اپنے ایک بیان میں مشیر اطلاعات کے پی بیرسٹر سیف نے کہا کہ مجوزہ ترامیم پر جعلی حکومت قوم کو جواب دے، آئینی ترامیم کا مسودہ میڈیا کے ذریعے قوم کے سامنے لایا جائے، مجوزہ ترامیم پر پاکستان سمیت انٹرنیشنل لیول پر بھی جگ ہنسائی کا موجب بن رہا ہے۔
بیرسٹر سیف کا کہنا تھا کہ جعلی حکومت مجوزہ ترامیم سے جمہوریت پر حملہ آور ہو رہی ہے، مجوزہ ترامیم کا مسودہ اپنے ہی ممبر قومی اسمبلی کو بھی نہیں دکھایا گیا، ایم این ایز کو صرف کہا گیا ہے کہ آپ نے ووٹ دینا ہے۔
مشیر اطلاعات کے پی کا یہ کہنا تھا کہ مسودہ اتنا خوفناک لگ رہا ہے کہ اسے اپنے ہی ممبران سے پوشیدہ رکھا جارہا ہے، مناسب ہوگا چیف جسٹس مجوزہ ترامیم پر اپنی پوزیشن واضح کر دیں۔
بیرسٹر سیف کا کہنا تھا کہ مجوزہ آئینی ترمیم کے ذریعے قانون کی حکمرانی کا گلا گھونٹ دیا جائے گا، چیف جسٹس کو اخلاقی طور پرتوسیع سمیت کسی بھی عہدہ سے دستبرداری کا واضح اعلان کرنا چاہیے۔
