فلسطین اور غزہ کے عوام سے اظہار یکجہتی کیلئے آل پارٹیز کانفرنس آج ہوگی۔
فلسطین اور غزہ کی عوام کے ساتھ یکجہتی کا اظہار کرنے کے لیے آل پارٹی کانفرنس آج ایوان صدر میں سہ پہر 3 بجے منعقد ہوگی۔ یہ کانفرنس صدر مملکت آصف علی زرداری اور وزیراعظم شہباز شریف کی دعوت پر بلائی گئی ہے۔
4 اکتوبر کو وزیر اعظم شہباز شریف نے چیئرمین پیپلز پارٹی بلاول بھٹو زرداری اور امیر جماعت اسلامی حافظ نعیم الرحمٰن سے وزیر اعظم ہاؤس میں ملاقات کی تھی۔ ملاقات کے بعد 7 اکتوبر کو یوم یکجہتی فلسطین منانے اور آل پارٹیز کانفرنس بلانے کا اعلان کیا گیا تھا، جس میں فلسطینی عوام کے حقوق کی حمایت اور ان پر جاری ظلم و ستم کے خلاف آواز اٹھانے کا عزم کیا گیا۔
ملاقات کے بعد یومِ یکجہتیِ فلسطین اور آل پارٹیز کانفرنس کے لیے ایک کمیٹی کی منظوری دی گئی، جس میں نائب وزیر اعظم و وزیر خارجہ اسحٰق ڈار، شیری رحمٰن، خواجہ سعد رفیق اور نیئر بخاری شامل ہیں۔
اس سے قبل، اسلام آباد میں حکومتی وفد نے ڈپٹی وزیر اعظم اسحاق ڈار کی قیادت میں جے یو آئی (ف) کے سربراہ مولانا فضل الرحمٰن سے ان کی رہائش گاہ پر ملاقات کی۔ وفد میں خواجہ سعد رفیق، نیئر بخاری، نوید قمر اور شیری رحمان شامل تھے۔ جبکہ جے یو آئی (ف) کی طرف سے مولانا عبدالغفور حیدری، مولانا صلاح الدین ایوبی اور محمد اسلم غوری نے شرکت کی۔ اس ملاقات میں ملکی سیاسی صورتحال پر گفتگو ہوئی اور مولانا فضل الرحمٰن کو آج کی آل پارٹیز کانفرنس میں شرکت کی دعوت دی گئی ہے۔
