اسلام آباد، آئینی ترمیم کے معاملے میں سربراہ جے یو آئی (ف) مولانا فضل الرحمن اپنے مؤقف پر ڈٹ گئے۔
ذرائع کے مطابق عدالتی اصلاحات کے حوالے سے آئینی ترمیم کیلئے حکومتی وفد نے رات گئے سربراہ جمعیت علمائے اسلام (ف) مولانا فضل الرحمن سے ملاقات کی اور انہیں ججز کی مدت ملازمت میں توسیع کے حوالے سے آئینی ترمیم پر حکومت کا ساتھ دینے پر آمادہ کرتے رہے لیکن سربراہ جے یو آئی اپنے مؤقف پر ڈٹے رہے۔
ذرائع کے مطابق مولانا فضل الرحمن کی جانب سے عدالتی اصلاحات لانے پر زور دیا گیا، رات گئے حکومتی وفد جس میں نائب وزیراعظم اسحاق ڈار، اعظم نذیر تارڑ اور محسن نقوی نے سربراہ جے یو آئی (ف) سے خصوصی ملاقات کی۔
وفد کیجانب مولانا فضل الرحمن کو آئینی ترمیم پر راضی کرنے کی کوشش کی گئی لیکن مولانا فضل الرحمن کی جانب سے ایک بار پھر فرد واحد کیلئے قانون سازی کو مسترد کردیا گیا۔
یاد رہے کہ اس سے پہلے بھی حکومت اور اتحادی مولانا فضل الرحمن کو منانے کے لیے ملاقاتیں کرچکے ہیں لیکن اس معاملے میں کوئی پیش رفت نہیں ہوئی تھی، صدر پاکستان آصف علی زرداری بھی مولانا فضل الرحمن سے اس سلسلے میں ایک ملاقات کرچکے ہیں۔
