سابق وفاقی وزیر فواد چودھری ایک بار پھر بانی پی ٹی آئی عمران خان کے حق میں بول پڑے، کہتے ہیں عمران خان کی سیاسی حیثیت تسلیم کیے بغیر ملک میں استحکام نہیں آسکتا۔
احتساب عدالت کے باہر میڈیا سے گفتگو کرتے ہوئے ان کا کہنا تھا کہ ملک میں اس وقت ٹینشن کا ماحول ہے۔
بانی پی ٹی آئی کی جمعہ کی کال اہمیت کی حامل ہے، اس پر بہت سی چیزیں طے ہونی ہیں اس سے سیاسی ٹمپریچر مزید بڑھے گا، ایک دوسرے کو روند کر آگے جانے سے سیاسی عدم استحکام مزید بڑھے گا۔
لوگوں کو خراب کرنے کیلئے جعلی کیس بنائے گئے ہیں یہ کیس 8 مہینوں سے انکوائری میں چل رہا ہے۔
سابق وفاقی وزیر کا مزید کہنا تھا کہ موجودہ حالات میں ہمیں گرینڈ پولیٹیکل ڈائیلاگ کا آغاز کرنا ہوگا جس میں اسٹیبلشمنٹ اور تمام سیاسی جماعتوں کو شامل کرنا ہوگا، تمام سیاسی جماعتوں کو ملکر راستہ نکالنا ہوگا۔
فواد چودھری کا مزید کہنا تھا کہ پاکستان کی دو تہائی اکثریت بانی پی ٹی آئی کے ساتھ کھڑی ہے۔
چیف جسٹس جس طرح سے سپریم کورٹ چلا رہے ہیں اس پر بھی بہت سے اعتراضات ہیں، سپریم کورٹ میں بہت زیادہ تقسیم ہے، لگ یہ رہا ہے چیف جسٹس ہر صورت میں توسیع چاہتے ہیں۔
