21
راولپنڈی، پاکستان تحریک انصاف کی رہنما عالیہ حمزہ کی تھانہ ایئرپورٹ کیس میں بعد از گرفتاری ضمانت منظور کرلی گئی۔
جوڈیشل مجسٹریٹ قمر عباس تارڑ نے کیس کی سماعت کے دوران فیصلہ سنایا۔ عالیہ حمزہ کی قانونی ٹیم کی قیادت محمد فیصل ملک نے کی، جو عدالت میں پیش ہوئے۔
عدالت نے عالیہ حمزہ کو1 لاکھ روپے کے ضمانتی مچلکے جمع کرانے کی شرط پر رہا کرنے کا حکم دے دیا۔
واضح رہے کہ عالیہ حمزہ اور 5 دیگر کارکنوں کے خلاف تھانہ ایئرپورٹ میں مقدمہ درج تھا، اور انہیں 14 روزہ جوڈیشل ریمانڈ پر جیل بھیجا گیا تھا۔
یاد رہے کہ عالیہ حمزہ پی ٹی آئی کی ایک سرگرم اور معروف رہنما ہیں، وہ قومی اسمبلی کی سابق رکن بھی رہ چکی ہیں، اور خواتین کی مخصوص نشست پر ایوان میں نمائندگی کر چکی ہیں،ان کی شہرت کا بڑا سبب ان کا دبنگ اندازِ گفتگو، پارٹی پالیسیوں کا پُرزور دفاع اور ٹی وی ٹاک شوز میں بھرپور شرکت ہے۔
