لاہور، صوبائی وزیر اطلاعات و رہنما مسلم لیگ ( ن) عظمیٰ بخاری کا کہنا تھا کہ جھوٹ بولنا اور سنسنی خیز خبریں بنوانا بشریٰ بی بی کا پرانا شوق رہا ہے۔
پی ٹی آئی رہنما بیرسٹر سیف کے بیان پر ردعمل دیتے ہوئے لیگی رہنما عظمیٰ بخاری کا کہنا تھا کہ روزانہ خبروں میں رہنے کا یہ بہت بھونڈا طریقہ ہے، بشریٰ بی بی انڈے کھائیں، مرغی کھائیں یا یخنی پلاؤ، مریم نواز کو اس کی کوئی پرواہ نہیں، وزیراعلیٰ کو کوئی خبر نہیں بشریٰ بی بی اڈیالہ جیل کے کس سیل میں ہیں۔
عظمیٰ بخاری کا کہنا تھا کہ بشریٰ بی بی کو جیل میں ان کے شوہر کی طرح بی کلاس کی سہولیات دی گئی ہیں، مریم نواز کو سابق وزیراعظم کے دور حکومت میں جن اذیتوں کا سامنا کرنا پڑا بشریٰ بی بی ان سب سے محفوظ ہیں۔
صوبائی مشیر اطلاعات کا کہنا تھا کہ وزیراعلیٰ مریم نواز کو کوٹ لکھپت جیل میں جن حالات میں رکھا گیا، یہ سب بشریٰ بی بی کی ایما پرکیا گیا تھا، وزیراعلیٰ مریم نواز نے جیل کی سختیاں برداشت کرلیں لیکن کبھی بھی عورت کارڈ استعمال نہیں کیا تھا۔
سینئر ن لیگی رہنما نے کہا کہ ان دونوں میاں بیوی کو جیل میں جو سہولیات میسر ہیں ایک عام شہری اس کا تصور بھی نہیں کر سکتا، بشریٰ بی بی اور سابق وزیراعظم وی آئی پی انداز میں جیل کاٹ رہے ہیں۔
