اسلام آباد: وفاقی وزیر مصدق ملک کی جانب سے سوال اٹھایا گیا ہے کہ تحریک انصاف احتجاج کے لیے خاص مواقع ہی کیوں چنتی ہے؟
ایک بیان میں وفاقی وزیر مصدق ملک کا کہنا تھا کہ ہمارا خواب ملک کی ترقی ہے جب کہ تحریک انصاف کا خواب جلاؤ گھیراؤ اور فساد ہے، فیصلہ کرلیں کونسا پاکستان چاہیے۔
وفاقی وزیر کا کہنا تھا کہ ہم مٹی کو ہیرا بنانے کی کوشش کررہے ہیں اور پاکستان تحریک انصاف والے اسی مٹی کو آگ لگا رہے ہیں کہ کہیں ہیرا نہ بن جائے۔
مصدق ملک کا کہنا تھا کہ جس شخص نے چینی صدر کا دورہ ملتوی کرایا وہی شنگھائی تعاون تنظیم کے اجلاس سے پہلے کنٹینر لگوارہا ہے، تحریک انصاف احتجاج کے لیے خاص مواقع ہی کیوں چنتی ہے؟
وفاقی وزیر کا کہنا تھا کہ تحریک انصاف کبھی آئی ایم ایف کو خط لکھتی ہے، کبھی غیرملکی مہمانوں کی آمد پر مظاہروں کے لیے نکل آتے ہیں، ملک میں فساد کی سیاست کی کوئی گنجائش نہیں ہے۔
دوسری جانب وفاقی وزیر اطلاعات عطا تارڑ کا کہنا تھا کہ تحریک انصاف پارلیمنٹ کے اندر آکر احتجاج کرے، صرف حکومتی نہیں آزاد تجزیہ کار بھی اعتراف کر رہے ہیں کہ معیشت بہتر ہورہی ہے۔
