امیر جماعت اسلامی پاکستان حافظ نعیم الرحمان کی جانب سے بلوچستان میں گاڑیوں سے اتار کر معصوم لوگوں کو قتل کرنے کی شدید الفاظ میں مذمت کرتے ہوئے یہ کہا گیا ہے جو کچھ ہوا یہ کھلی دہشتگردی ہے اسے کسی صورت میں قبول نہیں کیا جا ئے گا۔
حافظ نعیم الرحمان نے اپنے بیان میں کہا کہ جب بلوچستان میں لوگ لاپتا ہوتے ہیں تو ہر باضمیر شخص ان کے ساتھ کھڑا ہوتا ہے، لاپتا افراد کے معاملے پر ہم سب سے زیادہ آواز اٹھاتے ہیں، لوگوں کی زبان اور برادری کی بنیاد پر قتل کرنا کھلی دہشتگردی ہے۔
امیر جماعت اسلامی نے کہا کہ بلوچستان میں جو ہوا یہ ناصرف قابل مذمت بلکہ کھلی دہشتگردی ہے۔
حافظ نعیم الرحمان نے صوبائی اور وفاقی حکومت پر تنقید کرتے ہوئے یہ کہا کہ بلوچستان کی حکومت اور وفاقی حکومت کہاں ہے، ان کے ادارے کہاں ہیں، اس پوری دہشتگردی میں بیرونی ہاتھ ملوث نظر آتا ہے۔
امیر جماعت اسلامی کا یہ کہنا تھا کہ پاکستان میں رہنے والے ہر شخص کی جان کی حرمت ہے، بلوچستان کے معاملات کوانتہائی سنجیدگی سے دیکھنا ہوگا، لوگوں کے تحفظات کو دور کرنا ہوگا۔
یاد رہے کہ بلوچستان کے کئی اضلاع میں گزشتہ روز دہشتگردی کے پے در پے واقعات میں 37 سے زائد فراد جان کی بازی ہارگئے ہیں جبکہ سکیورٹی فورسز نے 21 دہشتگردوں کو بھی جہنم واصل کیا۔
