بانی پی ٹی آئی عمران خان کا کہنا تھا کہ علی امین گنڈا پور کے بیان پر معافی مانگنے والوں کو پارٹی میں نہیں ہونا چاہیے۔
بانی پی ٹی آئی و سابق وزیراعظم عمران خان نے کہا کہ علی امین گنڈا پور کی جانب سے قوم کے جذبات کی ترجمانی کی گئی ہے۔
اڈیالہ جیل میں صحافیوں سے غیر رسمی گفتگو کرتے ہوئے عمران خان کا کہنا تھا کہ میں علی امین گنڈا پور کے ساتھ کھڑا ہوں، بیان پر معافی مانگنے والے بزدل ہیں، معافی مانگنے والوں کو پارٹی میں نہیں ہونا چاہیے۔
سابق وزیراعظم پاکستان عمران خان نے کہا کہ ساری پارٹی کو ہدایت ہے اب اسٹیبلشمنٹ سے کوئی بات نہیں کرے گا، پہلے کبھی بھی بات چیت کے دروازے بند نہیں کیے، لیکن آج میں دروازے بند کررہا ہوں۔
عمران خان کا کہنا تھا کہ پارٹی کے 6 لوگ اسٹیبلشمنٹ سے بات کر رہے تھے، اجازت دیتے ہیں یا نہیں، تاہم 21ستمبر کو لاہورمیں جلسہ کریں گے۔
دوسری جانب چیئرمین پاکستان تحریک انصاف بیرسٹر گوہر علی کو رہا کردیا گیا۔
نجی ٹی وی چینل کے مطابق پولیس کے حوالے سے یہ بتایا گیا ہے کہ چیئرمین بیرسٹر گوہرکو تھانہ سنگجانی میں درج مقدمےسے ڈسچارج کردیا گیا۔
