پشاور، گورنر خیبرپختونخوا فیصل کریم کنڈی کا کہنا ہے کہ وہ اتنے کپڑے نہیں بدلتے جتنے صوبے میں وزیر بدلے جاتے ہیں۔
گورنر ہاؤس پشاور میں میڈیا سے گفتگو کے دوران گورنر کے پی فیصل کریم کنڈی کا کہنا ہے کہ صوبے میں امن و امان قائم کرنا صوبائی حکومت کی ذمہ داری ہے لیکن پولیس احتجاج پر تھی، 600 ارب پولیس کے لیے صوبائی حکومت کو ملے وہ کہاں گئے؟
گورنر خیبرپختونخوا کا کہنا تھا کہ صوبائی حکومت امن وامان قائم کرنے میں ناکام ہوچکی، امن وامان سے متعلق صوبائی کابینہ کا ایک بھی اجلاس نہیں ہوا۔
فیصل کریم کنڈی کا یہ کہنا تھا کہ افغان حکومت سے مذاکرات کرنے کی باتیں کی جارہی ہیں، افغان حکومت سے اگر بات کرنی ہے تو وفاقی حکومت نے کرنی ہے، کسی ملک سے ریاست بات کرے گی صوبہ کسی ملک سے ڈائریکٹ بات نہیں کرسکتا۔
گورنر کے پی کا یہ کہنا تھا کہ میں گورنر راج کے حق میں نہیں ہوں، ہم نے ان کو مضبوط حکومت دی مگر انہوں نے کیا کیا؟ اسمبلی میں کبھی امن وامان کی بات نہیں کی گئی، خیبرپختونخوا حکومت کرپشن کررہی ہے، میں اتنے کپڑے نہیں بدلتا جتنے یہاں وزیر بدلے جاتے ہیں۔
