اسلام آباد، سپریم کورٹ میں آرٹیکل 63 اے کی تشریح کے فیصلے کیخلاف نظرثانی اپیلوں پر سماعت کل تک ملتوی کر دی گئی ہے۔
چیف جسٹس قاضی فائز عیسیٰ کی سربراہی میں 5 رکنی لارجر بنچ کی جانب سے سماعت کی گئی، جسٹس منیب اختر، جسٹس امین الدین خان، جسٹس جمال مندو خیل، جسٹس مظہر عالم میاں خیل لارجر بنچ کا حصہ تھے۔
سماعت کے دوران جسٹس منیب اختر کی جانب سے بینچ میں شمولیت سے انکار کر دیا گیا، جسٹس منیب اختر کمرہ عدالت میں ہی نہ آئے۔
چیف جسٹس کی جانب سے یہ ریمارکس دیئے گئے، جسٹس منیب اختر سے درخواست ہے اس عدالتی کاروائی میں شامل ہو، اگر وہ بینچ میں شامل نہیں ہوتے تو نیا بینچ تشکیل دیا جائے گا۔
اسکے بعد سپریم کورٹ نے آرٹیکل 63 اے کی سماعت کل تک ملتوی کردی۔
یاد رہے کہ سابق چیف جسٹس عمر عطا بندیال کی سربراہی میں 5 رکنی لارجر بنچ نے 17 مئی 2022 کو فیصلہ سنایا تھا، اس وقت جسٹس منیب اختر اور جسٹس اعجاز الاحسن بنچ کا حصہ تھے۔
آرٹیکل 63 اے کی تشریح کے حوالے سے کیس کا فیصلہ 3 ،2 کی اکثریت سے دیا گیا، اس وقت جسٹس جمال مندوخیل اور جسٹس مظہر عالم میاں خیل کی جانب سے اختلاف کیا گیا تھا۔
اکثریتی فیصلے کے مطابق منحرف ارکان کا ووٹ شمار نہیں ہوگا، منحرف ارکان کی تاحیات نااہلی کیلئے پارلیمنٹ قانون سازی کر سکتی ہے۔
یاد رہے کہ سپریم کورٹ بار ایسوسی ایشن نے فیصلے کے خلاف نظرثانی کی درخواست دائر کر رکھی ہے۔
