وزیراعظم شہباز شریف کا کہنا ہے کہ ہم نے آئی ایم ایف کی تمام شرائط پوری کردی ہیں، بڑی کڑی شرائط تھیں، کچھ شرائط کا تعلق چین سے تھا، چین نے دوبارہ ہاتھ پکڑا اور ماضی کی طرح تعاون کیا۔
وزیراعطم شہباز شریف کا کہنا تھا کہ سعودی عرب، یو اے ای اور چینی قیادت کا شکر گزار ہوں ان کے تعاون کے بغیر یہ بالکل بھی ممکن نہیں تھا۔
وزیراعظم شہباز شریف نے کہا کہ اجتماعی کاوشوں سے حکومت اور اداروں نے ملکر معاشی چیلنجز کو قبول کیا، رات دن محنت سے معاشی اشاریوں میں بتدریج بہتری آ رہی ہے۔
انہوں نے اس موقع پر ترکیہ کے صدر رجب طیب اردوان سے بھی ملاقات کی، ملاقات میں دونوں رہنماؤں کیجانب سے مختلف معاملات پر سیر حاصل گفتگو بھی ہوئی۔
وزیراعظم شہباز شریف کا کہنا تھا کہ اقوام متحدہ میں ترکیہ کے صدر کی فلسطین پر تقریر دلوں کو چھو لینے والی تھی، جس طرح انہوں نے فلسطین کا مسئلہ بیان کیا، ہال میں موجود سب کے دلوں کو چھولیا، میں نے ترک صدر کو مبارکباد دی۔
انہوں نے کہا کہ ملاقات میں پاکستان اور ترکیہ کے درمیان برادرانہ تعلقات کے تمام پہلوؤں پر گفتگو ہوئی، صدر اردوان نے بتایا کہ وہ جلد پاکستان کا دورہ کریں گے۔
