لاہور، پنجاب سیف سٹیز اتھارٹی (PSCA) نے استعمال شدہ گاڑیوں کی خرید و فروخت کے حوالے سے ایک اہم نوٹس جاری کیا ہے۔ اتھارٹی نے تمام شہریوں کو خبردار کیا ہے کہ گاڑی خریدنے یا بیچنے سے پہلے ای-چالان کی مکمل تصدیق ضرور کریں، تاکہ بعد میں قانونی اور مالی مشکلات کا سامنا نہ کرنا پڑے۔
پنجاب میں اکثر گاڑیوں کے ساتھ ایسے زیرِ التواء ٹریفک جرمانے ہوتے ہیں جو بیچنے والے کی بجائے نئے خریدار پر منتقل ہو جاتے ہیں۔ ایسے چالان نہ صرف گاڑی کی رجسٹریشن میں رکاوٹ بنتے ہیں بلکہ دوبارہ فروخت میں بھی مسائل پیدا کر سکتے ہیں۔ بعض اوقات یہ صورتحال قانونی پیچیدگیوں تک بھی لے جا سکتی ہے۔
اتھارٹی نے گاڑی بیچنے والوں کو ہدایت کی ہے کہ گاڑی کی ملکیت فوراً منتقل کروائیں، تاکہ آئندہ ٹریفک قوانین کی خلاف ورزی یا جرمانے کی ذمہ داری بیچنے والے پر نہ آئے۔
شہری PSCA کے سرکاری ای-چالان پورٹل پر جا کر اپنی گاڑی کا رجسٹریشن نمبر درج کر کے تمام زیرِ التواء جرمانوں کی تفصیلات جان سکتے ہیں۔ یہ عمل دونوں فریقوں کو قانونی پیچیدگیوں سے بچانے میں مدد دیتا ہے اور لین دین کو شفاف بناتا ہے۔
ادائیگی کے آسان طریقے
چالان کی ادائیگی کے لیے PSCA کا آفیشل پورٹل اور ePay Punjab موبائل ایپ استعمال کی جا سکتی ہے، جو اینڈرائیڈ اور iOS دونوں پر دستیاب ہے۔ اس ایپ کے ذریعے موبائل بینکنگ، انٹرنیٹ بینکنگ، اے ٹی ایم، بینک برانچز اور ٹیلی کام ایجنٹس کے ذریعے ادائیگی ممکن ہے۔
مستقبل میں پریشانی سے بچاؤ
پنجاب سیف سٹیز اتھارٹی نے زور دیا ہے کہ ای-چالان کی تصدیق اور ادائیگی کو گاڑی کی خرید و فروخت کا لازمی حصہ سمجھا جائے۔ اس سے نہ صرف قانونی مسائل سے بچا جا سکتا ہے بلکہ گاڑی کی ملکیت کی منتقلی بھی آسان اور محفوظ ہو جاتی ہے۔
