واشنگٹن ٹائمز نے اپنے تجزیے میں فیلڈ مارشل عاصم منیر کو ’’سٹیل کے اعصاب‘‘ والا لیڈر قرار دیا اور انہیں پاک امریکا تعلقات و جنوبی ایشیا کی سکیورٹی پالیسی میں بااثر شخصیت تسلیم کیا۔
واشنگٹن، امریکی اخبار واشنگٹن ٹائمز نے اپنے حالیہ تجزیے میں پاکستان کے فیلڈ مارشل سید عاصم منیر کو ’’مردِ آہن‘‘ قرار دے دیا۔
رپورٹ کے مطابق ٹرمپ کے مودی سے تعلقات کشیدہ ہونے کے بعد جنرل عاصم منیر ایک مضبوط اور مؤثر قیادت کے طور پر سامنے آئے۔ پاک بھارت تنازع کے موقع پر انہیں ایک ’’سٹیل کے اعصاب والے لیڈر‘‘ کے طور پر سراہا گیا، جس سے ان کی بین الاقوامی ساکھ بلند ہوئی اور عالمی سطح پر نئی عزت ملی۔
اخبار کا کہنا ہے کہ جنرل عاصم منیر نے امریکی سینٹرل کمانڈ اور پینٹاگون کے ساتھ تعلقات بحال کیے، جس پر ٹرمپ نے پاکستان کو ایبی گیٹ بم دھماکے کے ماسٹر مائنڈ کو پکڑنے پر خصوصی طور پر شکریہ ادا کیا۔ رپورٹ کے مطابق ٹرمپ انتظامیہ پاکستان کی معدنیات اور کرپٹو کرنسی مارکیٹوں میں مواقع کو دیکھتے ہوئے تعلقات کو مزید مضبوط بنانا چاہتی ہے۔
واشنگٹن ٹائمز کے مطابق فیلڈ مارشل عاصم منیر کو امریکہ کے ساتھ پاکستان کے اسٹریٹجک تعلقات اور جنوبی ایشیا کی سکیورٹی پالیسی کے تناظر میں ایک بااثر شخصیت مانا جا رہا ہے۔ انہیں انتہائی مضبوط اعصاب کا مالک، نظم و ضبط کے پابند اور سخت فیصلے لینے والا پیشہ ور فوجی افسر قرار دیا گیا، جو خودنمائی اور سیاست سے گریز کرتے ہیں۔
اخبار کے مطابق پاک بھارت کشیدگی کے دوران ان کی عوامی مقبولیت میں اضافہ ہوا اور صدر ٹرمپ کے ساتھ ان کی ملاقات کو خطے کی کشیدہ صورتحال کے تناظر میں غیر معمولی اہمیت حاصل ہے۔
مزید کہا گیا کہ ٹرمپ نے پاکستان اور بھارت کے درمیان جنگ بندی میں کردار ادا کیا جس پر پاکستان نے ان کا شکریہ ادا کیا، جبکہ مودی نے ثالثی کی پیشکش مسترد کر دی۔ فیلڈ مارشل عاصم منیر نے افغانستان اور ایران سے لاحق خطرات کے حوالے سے مؤثر فوجی حکمت عملی اپنائی اور دہشت گرد تنظیموں کے خلاف سخت کارروائی کو یقینی بنایا۔
رپورٹ کے مطابق انسداد دہشت گردی کے تعاون نے پاک امریکا تعلقات کو مزید مضبوط کیا ہے اور ٹرمپ انتظامیہ پاکستان کے ساتھ تعلقات کی بحالی کے لیے سرگرم ہے۔
