پاکستان کے معدنی ذخائر کو عالمی سطح پر اہمیت حاصل ہے اور امریکی جریدے فارِن پالیسی نے بھی اس حقیقت کا اعتراف کیا ہے۔
جریدے کے مطابق پاکستان کے معدنی ذخائر تقریباً 2 لاکھ 30 ہزار مربع میل پر پھیلے ہوئے ہیں، جو عالمی معیار کے لحاظ سے اعلیٰ درجے کے ہیں اور برطانیہ کے رقبے سے تقریباً دوگنا ہیں۔
فارِن پالیسی کا کہنا ہے کہ معدنی شعبے میں بین الاقوامی سرمایہ کاری اور باہمی معاہدوں سے پاکستان اور سرمایہ کار ممالک دونوں کو معاشی، تکنیکی اور سماجی فوائد حاصل ہوں گے۔
پاکستان نے معدنی وسائل کے بہتر استعمال کے لیے قومی معدنی پالیسی 2025 مرتب کی ہے، جس کے فوائد خاص طور پر بلوچستان کے عوام تک پہنچیں گے۔ اس پالیسی کے تحت دیہی علاقوں میں انفراسٹرکچر، روزگار اور سماجی ترقی پر خصوصی توجہ دی جائے گی، جبکہ بلوچستان کے گریجویٹس کو ریکوڈک پروگرام کے تحت بیرونِ ملک تربیت کے لیے بھیجا جا رہا ہے۔
قومی معدنی پالیسی کے تحت پاکستان قدرتی وسائل کے پائیدار استعمال سے طویل المدتی ترقی اور قومی خودکفالت کی جانب گامزن ہے۔ بین الاقوامی تعاون اور ٹیکنالوجی شیئرنگ سے معدنیات کے شعبے میں مزید ترقی کی توقع ہے، اور اسی تناظر میں پاکستان کے معدنی وسائل کی عالمی اہمیت مسلم ہے۔
